ကမ္ဘာဦးအစကတည်းက လူသားတို့သည် ကိုးကွယ် အားထားမီခိုရာ ရှာဖွေခဲ့ကြရာတွင် တော ၊ တောင် ၊ ရေ ၊မြေ ၊ မီး စသည့် မိမိတို့ယုံကြည်ရာကို အားထားမှီခို ကိုးကွယ်ခဲ့ကြသည်။ generation တစ်ခုပြီးတစ်ခု ပြောင်းလဲလာသည်နှင့်အမျှ လူသားများ၏ ကိုးကွယ်မှု ပိုင်းဆိုင်ရာများ တဖြည်းဖြည်း ပြောင်းလဲလာခဲ့ကြပါသည်။
ထိုသို့ ကိုးကွယ်မှုများ ပြောင်းလဲလာခဲ့ကြရာတွင် လွန်ခဲ့သော နှစ်ပေါင်း(၂၅၀၀)ကျော်ကာလက ဘုရား၊ တရား ၊ သံဃာ ရတနာသုံးပါးကို ယုံကြည်ကိုးကွယ်မှု ပြုခဲ့ကြသောသူများရှိခဲ့ကြသည်။ ထိုသူများကို ဗုဒ္ဓဘာသာဝင်များဟု ခေါ်ဆိုကြပါသည်။ ဗုဒ္ဓဘာသာဝင်ဟူသည် ရတနာသုံးပါးကို ယုံကြည်ကြသောကြောင့် ဗုဒ္ဓ၏ အဆုံးအမများကို ချွင်းချက်မရှိ လိုက်နာကျင့်သုံးခဲ့ကြရာ အဆင့်အတန်းမြင့်သော ဘ၀သို့ ရောက်ရှိသူများသည် မရေမတွက်နိုင်အောင် များပြားသကဲ့သို့ ဗုဒ္ဓအဆုံးအမကို မလိုက်နာမကျင့်သုံးသောကြောင့် အဆင့်တန်းနိမ့်သော ဘ၀များသို့ ရောက်ရှိသူများသည်လည်း မရေတွက်နိုင်အောင်ပင် ဖြစ်ချေ၏။
ထိုဗုဒ္ဓဘာသာဝင်များထဲတွင် ရတနာသုံးပါးမှတစ်ပါး တစ်ခြားအားထားကိုးကွယ်ရာမရှိဟု အသိဥာဏ်ဖြင့် သိရှိထားကြသူ ဗုဒ္ဓ ဘာသာဝင် စစ်စစ်များ ရှိကြပါသည်။ ထို့ပြင် တကယ့်အရေး တကယ့်ဘေးနှင့် တွေ့ကြုံလာလျှင် ရတနာသုံးပါးကို အပေါ်ယံမျှသာ ယုံကြည်အားထားကြပြီး၊ လက်ရှိပစ္စုပ္ပန်၌ အမှန်တကယ် အားထားရမည်ဟု သေချာပေါက် မပြောနိုင်သော ဘိုးတော် မယ်တော် အန်းကုန်း သူရဿတီ ကွမ်ရင် စသည်များကို အားထားယုံကြည်နေကြသော ဗုဒ္ဓဖာသိဖာသာများလည်း ရှိနေကြသည့်အပြင်၊ ဗေဒင်၊ လက္ခဏာ၊ နတ်သူငယ်၊အတွင်း(၃၇)မင်း အပြင် (၃၇)မင်းနတ်များကို ဘုရားတစ်ဆူအလား ကိုးကွယ်နေကြသော မိရိုးဖလာ ဗုဒ္ဓဖာသိဖာသာ များလည်း ရှိကြပေသည်။
တစ်နေ့သ၌ ကလင်……ကလင်……ကလင် ဖုန်းသံကြောင့် စာရေးသူ ဖုန်းကိုင်လိုက်သောအခါ “အရှင်ဘုရား…..တပည့်တော်မ ( ) ပါဘုရား” ၊ ဟု မိတ်ဆက်စကားဆိုလာသည်။
စာရေးသူ “အင်း…….ပြောပါဦး ဘာကိစ္စများပါလိမ့်” ၊
ဒကာမကြီး “တစ်ခြားမဟုတ်ပါဘူးဘုရား… မနက်ဖြန် အရှင်ဘုရားတို့ ကျောင်းမှာ တပည့်တော်မ ခင်ပွန်းသည်ကို ရဟန်းဝတ် ပေးချင်လို့ပါဘုရား” ၊ ဟု ပြောလာပါ၏ ။
စာရေးသူ “ ကောင်းတာပေါ့ ဒကာမကြီး လာသာလာခဲ့ပါ” ။ ဟုဆိုကာ ရဟန်းခံရာ၌ လိုအပ်သော ပရိက္ခရာများဝယ်ရန် ပြောပြခဲ့ပါသည်။
ရဟန်းခံမည့်နေ့သို့ ရောက်သောအခါ ဒကာမကြီးက “ အရှင်ဘုရား….တပည့်တော်မ ခင်ပွန်းကို သိမ်ဝင်တဲ့အခါမှာ ကမ္မ၀ါစာ (၃)ကြိမ်တိတိ ဖတ်ပေးတော်မူပါဘုရား” ဟု ပြောလိုက်သောစကားကြောင့် အလွန် အံ့သြခဲ့ရပါသည်။
အမှန်စင်စစ်- ရဟန်းခံသည်ဆိုရာဝယ် ရဟန်းကိစ္စမှာ ရဟန်းများနှင့်သာ သက်ဆိုင်ပါသည်။ ရဟန်းခံ သိမ်ဝင်သည့်အခါတွင် လူပုဂ္ဂိုလ်များက စီမံ ပိုင်ခွင့် မရှိကြပါ။ ထိုကဲ့သို့ စီမံပိုင်ခွင့်သည် ယခင်ကလည်း မရှိခဲ့၊ ယခုလည်းမရှိ ၊ နှောင်လည်း ဘယ်သောအခါမျှ ရှိလိမ့်မည်မဟုတ်ချေ။ သို့ပါသော်လည်း ထိုဒကာမကြီးက သူကိုယ်တိုင် နားလည်သည့်ပမာ စီမံနေချေပြီ ။ စာရေးသူလည်း မနေနိင်သောကြောင့် “ ဒကာမကြီး ရဟန်းခံတဲ့အခါ ကမ္မ၀ါစာ (၃)ကြိမ်ဖတ်ရမယ် လို့ ဘယ်သူက ပြောတာလဲ၊ ဒါမှမဟုတ် ဒကာမကြီးကိုယ်တိုင်က သိလို့ ပြောတာလား” ဟု မေးရပါသည်။ “ အရှင်ဘုရား….တပည့်တော်မ သိလို့မဟုတ်ပါဘူး၊ ( )
ကျောင်းက ဘုန်းကြီးတစ်ပါးထံမှ ဗေဒင် အဟောထွက်လို့ပါဘုရား” ။ ဟု ဒကာမကြီးက အဖြေပေးပါသည်။ ဆက်လက်၍ စာရေးသူက “ ကမ္မ၀ါ(၃)ကြိမ်ဖတ်ရင် ဘာအကျိုးတွေ ရနိုင်တယ်ဆိုတာ ဗေဒင်ဆရာက မပြောလိုက်ဖူးလား” ။ ဟုမေးသောအခါ ထိုအမေးကို မဖြေဘဲ သူမ၏ အိမ်ထောင်ရေးပြဿနာ အကြောင်းကို ပြောပါလေတော့သည်။
သူမ၏ ခင်ပွန်းသည်သည် အမျိုးသမီးတစ်ယောက်နှင့် ငြိစွန်းကာ နောက်အိမ်ထောင်အသစ်တစ်ခု ထူထောင်တော့မည်ဖြစ်သည်။ ထိုအကြောင်းနှင့်ဆက်နွယ်၍ သူမသည် ဘုန်းကြီးတစ်ပါးထံ ဗေဒင်မေးခဲ့ရာ ဗေဒင်ဆရာဘုန်းကြီးက သူမ၏ အိမ်ထောင်ရေး အဆင်ပြေနိုင်ရန်အတွက် ခင်ပွန်းသည်အား ရဟန်းခံပေးရမှာဖြစ်ကြောင်း၊ ခင်ပွန်းသည် ရဟန်းခံသည့်အခါတွင် ကမ္မ၀ါစာ (၃)ကြိမ်ဖတ်ရမည်ဟု ဗေဒင်အဟောထွက်သောကြောင့် ယခုကဲ့သို့ လျှောက်ထားရခြင်း ဖြစ်ပါကြောင်း ပြောလာပါသည်။
သူမ၏ ပြောဆိုချက်များအရ ဤနေရာ၌ -
(၁)အိမ်ထောင်ရေးပြဿနာ ပြေလည်စေရန် ၊
(၂) ရဟန်းခံရခြင်း၏ ရည်ရွယ်ချက် ၊
(၃) ဗေဒင်ဆရာ၏ လမ်းညွန်ချက် ၊ ဟု အကြောင်းအရာသုံးချက် ထွက်ပေါ်လာသည်။
(၁) ခင်ပွန်းသည်အား ရဟန်းခံပေးခြင်းဖြင့် မိမိတို့ အိမ်ထောင်ရေးပြဿနာကို မဖြေရှင်းပေးနိုင်သကဲ့သို့ ဗေဒင်ဆရာကလည်း ဖြေရှင်းပေး၍ မရနိင်ပေ။ ထိုပြဿနာကို ဖြေရှင်းပေးနိုင်သောသူများကား ကာယကံရှင်များဖြစ်ကြသော အိမ်ထောင်ရှင် ဇနီးမောင်နှံ နှစ်ဦးသာဖြစ်ချေသည်။ ထိုအခြင်းအရာကို သူ သိနိုင်မည်ဆိုလျှင် ကောင်းလေစွ။
(၂) အိမ်ထောင်ရေးပြဿနာ ပြေလည်စေရန်ဟူသော ရည်ရွယ်ချက်ဖြင့် ရဟန်းပြုခြင်းသည် ညံ့ဖျင်းသော ရည်ရွယ်ချက်ဖြစ်ပါသည်။ သို့သော်လည်း ရဟန်းခံရသည့် ရည်ရွယ်ချက်သည် မည်မျှပင်ညံ့ဖျင်းနေစေကာမူ အကြောင်းမဟုတ်ပါ။ ရဟန်းခံဖြစ်သည် ကပင်လျှင် ကောင်းလှပါသည်ဟု ဆိုရပါမည်။
အဘယ့်ကြောင့်နည်းဟူမူ တစ်ခါက မြတ်စွာဘုရားရှင်သည် ကပိလ၀တ်နေပြည်တော်သို့ ကြွတော်မူစဉ် ညီတော်နန္ဒမင်းသားသည် ဇနပဒကလျာဏီမင်းသမီးနှင့် လက်ထပ်ထိမ်းမြားရမည့်နေ့နှင့်တိုက်ဆိုင်နေပါသည်။ မြတ်စွာဘုရားသည် ကပိလ၀တ်နန်းတော်မှ ပြန်ကြွတော်မူသောအခါ နန္ဒမင်းသားကို သပိတ်တော်ပေး၍ နောက်ပါးက လိုက်စေသည်။ ကျောင်းတော်သို့ ရောက်ရှိသောအခါ နန္ဒမင်းသားအား ရဟန်းပြုရန် မိန့်တော်မူ၏။ နန္ဒမင်းသားသည် သိဒ္ဓတ္ထမင်းသားဘ၀ ငယ်စဉ်ကပင်လျှင် ချစ်ကြောက်ရိုသေ ရသောကြောင့် ရဟန်းမပြုချင်သော်လည်း ပြုခဲ့ရရှာသည်။ အတန်ငယ်ကြာသော် နန်းတော်၌ ကျန်ရစ်ခဲ့သော ဇနပဒကလျာဏီမင်းသမီးကို လွမ်းလှသည့်အဖြစ်ကြောင့် လူထွက်လိုသောစိတ်ဖြစ်ပေါ်၍ နေပေ၏ သာသနာ၌ ငြီးငွေ့နေသော နန္ဒထေရ်အား ဘုရားရှင်သည် တာဝတိံသာ သို့ ခေါ်ဆောင်ပြီး နတ်သမီးတို့ကို ပြတော်မူရာ မိမိစွဲလမ်းနေသော ဇနပဒကလျာဏီသည် နတ်သမီးတို့နှင့် နှိုင်းယှဉ်လျှင် မျောက်အိုမနှင့်သာ ပမာတူလှပါပေ၏ ဟု သိမြင်ပြီး နတ်သမီးများကို ရလိုမှုဖြင့် တရားအားထုတ်ခဲ့ပါသည်။ အခြားရဟန်းများက ပြောင်လှောင်ကဲ့ရဲ့ကြသဖြင့် သံဝေဂရကာ တရားအားထုတ်သောအခါ ရဟန္တာဖြစ်တော်မူခဲ့ရလေသည်။ ထို့ကြောင့်ရဟန်းခံရာ၌ ရည်ရွယ်ချက်မကောင်းသော်လည်း အကြောင်းမဟုတ်ပါချေ။
(၃) ဗေဒင်ဆရာ၏ လမ်းညွန်ချက်။
ဗေဒင်ဆရာ၏ လမ်းညွန်ချက်အတိုင်း ရဟန်းခံရာ၌ ကမ္မ၀ါ(၃)ကြိမ်ဖတ်ရုံမျှဖြင့် အိမ်ထောင်ရေး ပြဿနာဖြေရှင်းပေးနိုင်သည်ဆိုသည်မှာ သဘာဝမကျပါချေ။ ရဟန်းတော်များသည် သိမ်ဝင်ပြီး ရဟန်းခံပေးရာ၌ ရှေးယခင်ကလည်း ကမ္မ၀ါ(၃)ကြိမ်ဖတ်ခဲ့ရပါသည်။ ယခုလည်းဖတ်ရပါသည် ၊ နောင်လည်း ဖတ်ရပါဦးမည်။ ဗေဒင်ဆရာပြောမှ ဖတ်ရမည်မဟုတ်ပါ။ ဗေဒင်ဆရာက အထူးအဆန်းလုပ်ခါ ပြော လိုက်သောစကားကို အဟုတ်ကြီးထင်မှတ်ကြလေသည်။ ဤနေရာ၌ ဗေဒင်ဆရာ အပြစ်ဟု ပြော၍ မရနိုင်ပါချေ။ လောက၀ယ် ဟုတ်၏-မဟုတ်၏ ၊ ဖြစ်နိုင်၏ - မဖြစ်နိုင်၏ ဟူသည်ကို မိမိ၏ ကိုယ်ပို်င်ဥာဏ်ဖြင့် စဉ်းစားဆင်ခြင်သုံးသပ်မှု မရှိဘဲ ၊ သူတစ်ပါး၏ အလိမ်ခံချင်နေကြသော သူများ ရှိနေသမျှ ကာလပတ်လုံး ဗေဒင်ဆရာတို့၏ အလိမ်ကို ခံနေကြရဦးမည်ဖြစ်ပါသည်။ အလိမ်ခံမည့်သူများမရှိလျှင် ဗေဒင်ဆရာများ၏ ဘ၀သည်လည်း ရပ်တည်နိုင်တော့မည် မဟုတ်ပါချေ။ ထို့ကြောင့် လူအများတို့သည် ဖြစ်လာသော အကြောင်းအရာ ပြဿနာများအပေါ်၌ ဗေဒင်ဆရာ၏ အဆုံးအဖြတ်ကို မယူသင့်ပေ။ သူတစ်ပါး ပါးစပ်ဖျား၌ လမ်းဆုံး၍ မနေဘဲ ၊ မိမိကိုယ်ပို်င်ဥာဏ်ကို အသုံးချပြီး မှန်ကန်အောင် ဆုံးဖြတ်စေချင်လှပါသည်။
ဤဆောင်းပါး၌ ဗေဒင်ကို အပြစ်ပြောနေသည်ဟု စာဖတ်သူများက မယူဆစေချင်ပေ။ လောက၌ သဘာဝကျကျ တွေးခေါ်တတ်ရန် ရေးသားပေးရခြင်းဖြစ်ပါသည်။
ဗေဒင်မေးသောအခါ မွေးသက္ကရာဇ် အပေါ်မူတည်၍ ဗေဒင်ပညာဖြင့် တွက်ချက်ပြီး ဟောစာတမ်းအမျိုးစုံ အောင် ထွက်ပေါ်လာရသည်။ မွေးသက္ကရာဇ် မတူညီခြင်းကြောင့် ဟောစာတမ်းများ မတူညီကြ၊ဟုဆိုလျှင် လောက၌ မွေးသက္ကသရာဇ်ခြင်းတူညီကြသော အမွှာပူးများ၏ ကံကြမ္မာခြင်းလည်း တူညီကြမည်ဖြစ်ပါသည်။ စာရေးသူ၏ တူ/တူမ သုံးယောက်သည် လောကကြီးအတွင်းသို့ တစ်နေ့တည်း ရောက်ရှိလာကြသည်။ ကလေးသုံးယောက်သည် အမွှားပူးပင်ဖြစ်သော် လည်း တစ်ယောက်နှင့်တစ်ယောက် စရိုက်လက္ခဏာခြင်း ကွာခြားကြသည့်အပြင် အကျိုးပေးခြင်းလည်း ကွာလွန်းလှပါသည်။ ဗေဒင်အလိုကမူ တစ်နေ့ထဲ ရှေ့ဆက် နောက်ဆက် ရောက်လာကြသောကြောင့် တူညီကြရမည်ဖြစ်သည်။ ထိုသို့ဖြစ်ရခြင်းသည် အဘယ့်ကြောင့်ပါနည်း။
ဗေဒင်အလိုအရ နေ့ကောင်းရက်သာ ရွေးပြီး ဆောက်လုပ်ခဲ့သော အိမ်များ ဖြစ်သော်လည်း အဘယ့်ကြောင့် မီးဘေးသင့်ပါသနည်း။ အမှန်ဆိုလျှင် နေ့ကောင်းရက်မြတ်၌ ဆောက်လုပ်သောကြောင့် မီးဘေးလွတ်ရမည်သာ။
နေ့ကောင်းရက်မြတ် ရွေးပြီး ထ်ိမ်းမြားလက်ထပ်ကြသော ဇနီးမောင်နှံများ အဘယ့်ကြောင့် အိမ် ထောင်ရေး မသာယာဘဲ ကွဲပြဲကြရပါသနည်း။
“သောကြာရေကြောင်း မသွားကောင်းဟု ဆိုသော်လည်း သောကြာနေ့ ရေလမ်းခရီးသွားသောသူများ အဘယ့်ကြောင့် အန္တရာယ်နှင့် မကြုံကြရပါသနည်း။ သောကြာနေ့မှတစ်ပါး တစ်ခြားနေ့ရက်များ၌ ရေကြောင်းခရီး သွားသူများသည် အဘယ့်ကြောင့် အန္တရာယ်ဆိုးနဲ့ ကြုံကြိုက်ကြရပါသနည်း။ ။
မွေးနေ့သောကြာ တနင်္လာ ကေသာဆံဖြတ် မပြုအပ်၊ဟု ဗေဒင်အလိုအရ ရှိပါသော်လည်း သောကြာ တနင်္လာစသည်၌ ဆံပင်ဖြတ်သူများ မည်သည့် အန္တရာယ်မျှ မဖြစ်ပေါ်လာချေ။ ထိုသို့ဖြစ်ရခြင်းသည် အဘယ့်ကြောင်ပါနည်း။
စနေဂြိုလ်လွန်လျှင်ကောင်းမည်ဟု ပြောကြသော်လည်း စနေဂြိုလ်လွန်မြောက်မှ စီးပွားပျက်သူများ၊ အိမ်ထောင်ရေးပျက်သူများ၊ ကျန်းမာရေးအရ အနာရောဂါဖိစီးပြီး အသက်သေဆုံးကြရသူများ ရှိကြပါသည်။ ထိုသို့ ဖြစ်ရခြင်းသည် အဘယ်ကြောင့်ပါနည်း။
“ဓ,မ္မ၊ သော,က၊ အင်း,၀၊ ရာ,ဇာ” ရန်ဖက်ခြင်း ပေါင်းဖေါ်မှုမပြုရဟု ဆိုရာဝယ် ရန်ဖက်ခြင်း အိမ်ထောင်ပြုထားကြသော်လည်း မပြိုမကွဲဘဲ သက်ဆုံးတိုင်အောင် ပေါင်းဖေါ်ကြရပြီး စီးပွားရေးဖက်၌လည်း အောင်မြင်သူများရှိသကဲ့သို့၊ “ ဦး,သာ ၊ စိန်,ပန်း ၊ ဒန်း,လှ ၊ ကို , ရှာ ။ မိတ်ဖက်ခြင်း အိမ်ထောင်ပြုထားကြသော သူများသည် မကြာမီ အိမ်ထောင်ပြိုကွဲသွားကြသူများလည်း ရှိနေကြပေသည် ။ ယင်းသို့ ဖြစ်ရခြင်းသည် အဘယ့်ကြောင့်ပါနည်း။
သိဒ္ဓတ္ထမင်းသားနှင့်အတူ လောကအတွင်းသို့ တစ်ပြိုင်နက် တစ်နေ့တည်း၊ တစ်ချိန်တည်း မွေးဖွားလာကြကုန်သော ဖွားဖက်တော်များ(၇)ပါး ရှိခဲ့ပါသည်။ ၄င်းတို့အနက် အသက်ရှိ(၅)ဦးမှာ - ယသော်ဓယာ မင်းသမီး၊ ညီတော် အာနန္ဒာ ၊ မောင်ဆန် ၊ ကဏ္ဍကမြင်း ၊ ကာဠုဒါယီ ၊ ဖြစ်ပါသည်။ သူတို့သည် လောကထဲသို့ တစ်ချိန်တည်း ရောက်လာကြသည်။ ဗေဒင်အလိုအရ ဆိုလျှင် တစ်ချိန်တည်း မွေးကြသည့်အတွက် သူတို့ဖြစ်စဉ်များ တူညီကြရမည်ဖြစ်သည်။ သို့သော်လည်း ဖွားဖက်တော်များ၏ တစ်ဦးနှင့်တစ်ဦး ဘ၀ပေးကံများမတူညီ ကြသောကြောင့် သူတို့၏ ဘ၀ဖြစ်စဉ်များလည်း မတူညီခဲ့ကြခြင်းမှာ စဉ်းစားတွေးတောစရာဖြစ်နေပါသည်။
ဗေဒင်အရာ၌ အလွန်ကျွမ်းကျင်သော ကောဏ္ဍညပုဏ္ဏားသည် သိဒ္ဓတ္ထမင်းသား ဘုရားဧကန်စင်စစ် ဖြစ်ကိုဖြစ်ရမည်ဟု သူ၏ဗေဒင်ပညာကို ယုံကြည်ကာ ပရိသတ်အလယ်၌ ရဲ့ဝံ့စွာ ဟောခဲ့သော်လည်း၊ သိဒ္ဓတ္ထမင်းသားသည် ပြင်းထန်သောအကျင့်တရားမှသည် ပုံမှန်ကျင့်ရသော အကျင့်သို့ ကူးပြောင်းလိုက်သည့်အချိန်မှစ၍ ဒီဘ၀ သိဒ္ဓတ္ထမင်းသားသည် ဘုရားမဖြစ်နိုင်တော့ဟု ဆိုကာ သူ၏ဗေဒင်အပေါ်၌ ယုံမှားသံသယဖြစ်ခဲ့ရပါသေးသည် မဟုတ်ပါလား။
ဤမျှဖြင့် ဗေဒင်နည်းပညာ၏ မသေချာမရေရာသည်ကို ထင်မြင်လောက်ပါပြီ။
ဦးကောဝိဒ(မြိတ်)
No comments:
Post a Comment