Thursday, January 31, 2008

နတ် လူ သာဓု ခေါ်စေသော်

ကျွန်တော်တို့နိုင်ငံတွင် သာသနာ့ပျိုးခင်း ပရိယတ္တိစာသင်တိုက်ကြီးတွေအများအပြား ရှိကြပါသည်။ ထိုသို့ စာသင်တိုက်ကြီးတွေ များပြားလှသည်နှင့်အမျှ မြတ်ဗုဒ္ဓ၏သာသနာတော်မြတ်ကြီး အရှည်တည်တံ့ခိုင်မြဲစေရေး အတွက် နှုတ်ဆင့်ကမ်း၊ လက်ဆင့်ကမ်း၍ ဆောင်တော်မူကြမည့် အနယ်နယ်အရပ်ရပ်မှ ရန်ကုန်၊ မန္တလေးမြို့များရှိ စာသင်တိုက်ကြီးများတွင် ပညာရည်နို့ သောက်စို့လျက်ရှိကြကုန်သော ရဟန်းသာမဏေ များသည်လည်း များစွာသော ကျောင်းတိုက်ကြီးများ၌ အပြည့်အလျှံပင် ဖြစ်ကြပါ၏။ ထိုရဟန်း သာမဏေ စာသင်သားတို့သည် လူဝတ်ကြောင် ကျောင်းသားများကဲ့သို့ အမေ အမတို့ ခူးခပ်ထည့်ပေးထားသော ထမင်းဘူးကို အဆင်သင့် ကောက်ယူ၍ စတိုင်ကျကျ ကျောင်းတက်ကြရသည် မဟုတ်ကြကုန်။ မိမိတို့၏ ၀မ်းစာအတွက် မိမိတို့၏သလုံးမြင်းခေါင်းကိုသာ အားကိုးကာ ရှာဖွေတော်မူကြရ၏။ ထို့ကြောင်း ကျွန်တော်တို့ ဒါယကာ၊ ဒါယိကာမတို့ကလည်း မြတ်ဗုဒ္ဓသာသနာတော် ဆက်လက်ရှင်သန်စေရေးအတွက် တစ်ဖက်တစ်လမ်းမှ ကူညီပံ့ပိုးသောအားဖြင့် ထိုသာသနာ့မျိုးဆက် ရှင်ရဟန်းသာမဏေတို့ကို ဆွမ်းအစရှိသော ပစ္စည်းလေးပါးတို့ဖြင့် မိမိတို့ တတ်စွမ်းသမျှ ထောက်ပံ့လှူဒါန်းကြရပေသည်။
ကျွန်တော်နှင့်ဦးလေးတို့ မိသားစုသည် ကြာသာပတေးနေ့တိုင်း ဆွမ်းလောင်းဓမ္မာရုံတွင် ဆွမ်းလောင်းလှူလေ့ ရှိသည့်အပြင် အိမ်တွင်လည်း ထိုင်ကိုယ်တော်များကို ပင့်ဖိတ် ဆွမ်းကပ်လေ့ရှိပါသည်။ ထို့ပြင်လည်း စာသင်သားသံဃာများ ဖြစ်နေသောကြောင့် ဘောလ်ပင်၊ ဗလာစာအုပ် စသော စာရေးကိရိယာများကိုလည်း အခါအားလျော်စွာ လှူဒါန်းပါသည်။ ထိုအထဲတွင် ရပ်ရွာက ဆွေမျိုးရိပ်မကင်းသည့် ဦးပဉ္စင်းများလည်း ပါဝင်လျက်ရှိရာ ထိုဆွေမျိုး ဦးပဉ္စင်းများထဲမှ ဦးပဉ္စင်းတစ်ပါးမှာ ကျန်းမာရေး သိပ်ပြီးမကောင်းလှပါ။ အထက်ပိုင်း ဒေသတွင် ခေတ်တ္တသီတင်းသုံးစဉ်က ဖြစ်ခဲ့ရသည့် ငှက်ဖျားရောဂါကို အမြစ်ပြတ် ကင်းစင်အောင် ကုသခြင်း မပြုခဲ့၍လား မသိ (ကျွန်တော့်အထင်ပါ) ။ ခဏခဏ ဖျားတတ်၏။ စာမေးပွဲဖြေခါနီးတွင် အတော်လေး နေမကောင်းသဖြင့် ဓမ္မာစရိယစာမေးပွဲကို မဖြေနိုင်တော့ဘဲ ရွာသို့ ပြန်ကြွသွားခဲ့ရပါတော့သည်။ ကျန်ရစ်သည့် ဦးပဉ္စင်းများ စာမေးပွဲဖြေပြီး၍ ရွာသို့ ခေတ္တပြန်ကြွခါနီးတွင် လာရောက်နှုတ်ဆက်ကြသဖြင့် “နေမကောင်းဖြစ်နေတဲ့ ဦးပဉ္စင်းလေးကို ဆေးစစ်ဖို့နဲ့ ဆေးကုသမှုခံယူဖို့ ပြန်ပင့်ခဲ့ကြပါဘုရား”ဟု လျှောက်ထားလိုက်ပါသည်။

ရိုးရာကိုင်၏- မကိုင်၏
ဦးပဉ္စင်းများ မြို့သို့ ပြန်ကြွလာသောအခါ ထိုနေမကောင်းသော ဦးပဉ္စင်းလေး မပါလာ၍ မေးလျှောက်ကြည့်ရာတွင် ဦးပဉ္စင်းများက “ခေါ်မရခဲ့ဘူး ဒကာလေးရေ၊ ဆီးဖြူ-ဖန်ခါး-နွားကျင်ငယ်ရေများနဲ့ ဖော်စပ်ရတဲ့ ဘုရားဆေးနည်းတော်အတိုင်း ဖော်စပ်ပြီး စားကြည့်ဦးမယ်တဲ့။ ပိန်သွားလိုက်တာ ဒကာလေးရယ်” ဟု ဦးပဉ္စင်းတစ်ပါးက မိန့်ပါ၏။ ကျွန်တော်က “ဘုရားဆေးနည်းတော်နဲ့ ကုတာလဲ ကုတာပေါ့ဘုရား။ ဒါပေမယ့် အခုခေတ်က ရောဂါတွေက ဆန်းပြားတယ်မဟုတ်လား။ ဒါကြောင့် ဓါတ်မှန်ရိုက်တန်ရိုက်၊ သွေးစစ်တန်စစ်ပြီး ရောဂါရှာဖွေ စစ်ဆေးကြည့်ချင်တယ် ဘုရား။ ဒါမှလဲ အနာသိ ဆေးရှိဆိုတဲ့အတိုင်း ကုသရတာ လွယ်ကူတာပေါ့ ဘုရား ။ ကုတာကတော့ ဘုရားဆေးနဲ့ပဲ ကုကု၊ သိပ္ပံဆေးနဲ့ပဲ ကုကု၊ တိုင်းရင်းဆေးနဲ့ပဲ ကုကု ဆန္ဒရှိသလို ကုလို့ရပါတယ် ဘုရား” ဟု လျှောက်တင်မိပါ၏။
“ဦးပဉ္စင်းတို့လဲ ပြောတာပါပဲ ဒကာလေးရယ်။ သူတွင်မကဘူး၊ သူ့ရဟန်း ဒကာ၊ ရဟန်းအမများရဲ့ အိမ်ကြွပြီး ဦးပဉ္စင်း မြို့ကိုပြန်လိုက်အောင် ဖျောင်းဖျ၊ တိုက်တွန်းပေးဖို့သွားပြောတော့ ဦးပဉ္စင်းကို ရိုးရာနတ် ကိုင်ထားတယ်လို့ အဟောထွက်ထားလို့ နတ်တင်ကြည်ပါဦးမယ်တဲ့ ဒကာရဲ့” ဟု စိတ်မကောင်းသံဖြင့် မိန့်ပါသည်။
“ဘယ်လိုဘုရား” မကြားလိုက်ရ၍ ထပ်မေးခြင်း မဟုတ်ပါ။ ပီပီသသကြီးကို ကြားလိုက်ရပါသည်။ အံ့အားသင့်သွား၍ အာမေဍိတ်တစ်လုံး တုန်လှုပ်ချောက်ချားစွာ ခုန်ထွက်သွားခြင်းဖြစ်ပါ၏။
“ကြံကြံဖန်ဖန် ဘုရား၊ ဗုဒ္ဓသာဝက သာသနာ့ဝန်ထမ်း ရဟန်းတော်ကို ရိုးရာနတ်ကိုင်ရတယ်လို့” ဟူ၍လည်း အံသြ ထိတ်လန့် ၀မ်းနည်းကြေကွဲ ယူကျုံးမရခြင်းများဖြင့် ဆို့နင့်စွာ ရေရွတ်မိပါတော့သည်။ “သြော် လူတွေ လူတွေ ၊ ပြောတော့ ဗုဒ္ဓဘာသာ၊ လုပ်ဆောင်နေကြတာက ဘုရားနှင့် ဆန့်ကျင်ဘက်ချည်းပါလား”
လူသားများ လောကတွင် ကပ်ဘေးများ ဆိုက်ရောက်ခဲ့ပါက ဘုရားရှင်အမှူးပြုလျက် သံဃာတော် အရှင်မြတ်များကို ဒေသစာရီ ကြွချီတော်မူကြပြီး ပရိတ်တော်များ ရွတ်ဖတ်သရဇ္ဈာယ်တော်မူကြခြင်း၊ လူများကို ကောင်းသောအကျင့်သီလများ ဆောက်တည်ပွားများကြရန် ဟောကြားတော်မူကြခြင်းဖြင့် ကပ်သုံးပါးနှင့် ဘေးဆိုးအန္တရာယ်များမှ လွတ်ကင်ချမ်းသာကြရကြောင်း ထေရ၀ါဒ သမိုင်းကြောင်း အစဉ်အလာရှိပါသည်။ (ပရိတ်ကြီး ၁၁သုတ် ဖြစ်တော်စဉ် သမိုင်းတွင်ရှုပါ။) မျက်မှောက်ကာလတွင်လည်း လူသားများ ဘယာဝေး၍ အေးချမ်းသာယာရေးအတွက် မြန်မာနိုင်ငံအနှံ့အပြား၌ နေရာဒေသအသီးသီး နှစ်ဆန်းတစ်ရက်နေ့တိုင်းပင် အန္တရာယ်ကင်းပရိတ်တော်များ ရွတ်ပွားကြခြင်း၊ အသံမစဲ ပဋ္ဌာန်းပူဇော်ပွဲများ အခါအားလျော်စွာ ကျင်းပနေကြ သည်မှာ အထင်အရှားဖြစ်သည်။ ထို့ပြင် မြေကွက်ဝယ်ဝယ်၊ တိုက်တာအိမ်ကိုပင် ဆောက်ဆောက်၊ မြေသန့် ကမ္မ၀ါရွတ်ဖတ်ကြခြင်း၊ အိမ်တက်-တိုက်တက် မင်္ဂလာကျင်းပကြခြင်းနှင့် ရဟန်းတော်များ ဖိတ်ကြား၍ တရားနာယူကြရသည်သာ ဖြစ်ပါ၏။
ယခုတော့ လူသားလောကကို အန္တရာယ်ကင်းအောင် ပြုဆောင်ပေးတော်မူကြသော၊ လောကကို သန့်ရှင်း စင်ကြယ်မှု ပြုတော်မူနေကြသော ဗုဒ္ဓ၏သာဝက ရဟန်းတော်မြတ်ကိုမှ အပါယ်လေးပါး စာရင်းဝင် ၃၇ မင်း ရိုးရာနတ်ဆိုသူက ခန္ဓာကိုယ်ကို ရောဂါဝေဒနာများကပ်အောင် ဖမ်းစားမှုပြုနိုင်သတဲ့ ။ “ဟောသူကလဲ ဟောပါပေ့။ ယုံသူကလည်း ယုံကြပါပေ့” ဟုသာ ဆိုလိုက်ချင်ပါတော့သည်။

နတ်က ဘုန်းကြီးကို ဆံပင်နုတ်လေသတတ်
မကြာခင် ထိုဦးပဉ္စင်းသည် ရွာသို့ ကိစ္စတစ်ခုဖြင့်ကြွရင်း နေမကောင်းသော ဦးပဉ္စင်းကို ပြန်ပင့်လာ၏။ ကျွန်တော်လည်း ကတိအတိုင်း ဆေးခန်းများသို့ လိုက်ပြ ကုသပေးပါသည်။ ယခု အတော်ပင် ကျန်းမာနေပါပြီ။ နေမကောင်းစဉ်ကတည်းက ဆေးခန်းပို့ဖို့ အကြိမ်ကြိမ်လျှောက်ထားသော်လည်း ဦးပဉ္စင်းက သူ့အတွက်နှင့် တစ်ပါးသူတို့ တာဝန်ဒုက္ခပိုနေကြမည်ကို မဖြစ်စေလို၍ ခွင့်ပြုတော်မူခြင်း မရှိခဲ့ပါ။ အလှူဝတ္ထုငွေများကိုလည်း လက်မခံခဲ့။ အကယ်၍သာ ထိုစဉ်ကတည်းက ကုသခဲ့မည်ဆိုလျှင် ဓမ္မာစရိယ စာမေးပွဲကို ချောချောမွေ့မွေ့ ဖြေဆိုအောင်မြင်နိုင်လိမ့်မည်ဟု ကျွန်တော်ယုံကြည်လျက် နှမြောနေမိပါသည်။
ထို့ပြင် ရဟန်းတော်ကို နတ်ကိုင်သည်သည်ဟု ဆိုခြင်းကို အစာမကျေဖြစ်နေသော ကျွန်တော်က “ဦးပဉ္စင်းကို နတ်ကိုင်တယ်ဆို ဘုရား”ဟု မေးလျှောက်မိရာ ဦးပဉ္စင်းက သူ့ရဟန်း ဒကာ၊ ဒကာမတို့အတွက် ရှက်စနိုးတော် မူဟန်တူသည် ရှက်ပြုံးလေး ပြုံးနေ၏။ကျွန်တော်က မကျေနပ်နိုင်သေးဘဲ “လူတွေ ဒီလို အယူအဆလွဲနေတာကို ရွာဦးကျောင်း ဘုန်းတော်ကြီး မသိဘူးလား ဘုရား” ဟု ဆက်လက်မေးလျှောက်ပြန်သည်တွင် နေမကောင်းသော ဦးပဉ္စင်းကို ပြန်ပင့်လာသော ဦးပဉ္စင်းက “မပြောပါနဲ့တော့ ဒကာရယ်၊ ရွာဦးကျောင်း ဘုန်းကြီးကိုယ်တိုင်တောင် နတ်နုတ်ခံရလို့ ခေါင်းပြောင်နေသတဲ့။ အဲ့ဒါနဲ့ နတ်ဆရာကိုမေးတော့ နတ်က လက်ရှိနေရာမှာ မပျော်လို့ဆိုတာနဲ့ နတ်စင်နေရာ ရွှေ့ပေးလိုက်မှ ဘုန်းကြီး ဆံပင် ပြန်ပေါက်သတဲ့ ဒကာရေ့” ဟူလေ၏။
ကျွန်တော် ငိုအားထက် ရယ်အားသန် ဖြစ်သွားပါသည်။ သို့သော် ချက်ချင်းပင် စိတ်မချမ်းမသာ ဖြစ်သွားမိပါ၏။ “ဖြစ်ရလေ ဘုရား၊ တပည့်တော်တို့လဲ တစ်ခါတစ်ရံ အပူအားကြီးတဲ့အခါ ဆံပင်ကျွတ်တတ်တာပါပဲ ဘုရား၊ ဆေးဝါးနဲ့ ပြုပြင်လိုက်လို့ အပူအအေးမျှတ ညီညွတ်သွားရင် ဆံပင်ပြန်ပေါက်တာပါပဲ ဘုရား။ ဘယ်မှာ နတ်နှုတ်တာ ဟုတ်မလဲ ဘုရား။ အချို့လူတွေများ ခေါင်းတစ်ဝက်လောက်၊ အချို့တစ်ခေါင်းလုံးနီးပါး ထိပ်ပြောင်နေကြတာတွေဟာ ဒီလိုဆို ခက်ကရောပေါ့။ နတ်စင်ရွှေ့လိုက်မှ ဆံပင်ပြန်ပေါက်တယ် ဆိုတာကလဲ ထန်းသီးကြွေခိုက် ကျီးနင်းခိုက် ဖြစ်မှာပါ ဘုရား ”
“ဟုတ်ပါတယ် ဒကာရယ် ၊ ဒါပေမယ့် ဘုန်းကြီးကလဲ သူကိုယ်တိုင် လက်တွေ့ခံရတာဆိုပြီး စွဲနေ ယုံနေတယ်”
သွားပြီ။ “ခုမှ ကယ်သူဝေးပါပေါ့၊ လှေကွဲက အဖာ” ဆိုသကဲ့သို့ ဖြစ်တော့သည်။ ရှင်တော်ဗုဒ္ဓက လူအဖြစ် ရခဲစွ၊ ယောက်ျားဘ၀ ရခဲစွ၊ ရဟန်းအဖြစ် ရခဲစွ၊ သာသနာတော်ကြီးနှင့် ကြုံကြှိုက်ခဲစွ၊ သဒ္ဒါတရား ရှိခဲစွ- ဟု ရရန်၊ ဖြစ်ရန် ခဲယဉ်းလှသော ဒုလ္လဘတရား ငါးပါးဟူ၍ ဟောကြားတော်မူခဲ့ပါသည်။ ထိုဒုလ္လဘတရားငါးပါးကို ပိုင်ဆိုင်သူတို့ကား လူသားဖြစ်သော ရဟန်းသာမဏေ၊ သံဃာတော်များမှတစ်ပါး အခြားမရှိ။ မည်သည့် ဗြဟ္မာ၊ သိကြား၊ နတ်များမှ မရနိုင်ကြပါချေ။ ထို့ကြောင့်လည်း မြတ်ဗုဒ္ဓက ယနေ့မှဖြစ်သည့် ပုထုဇဉ်သာမဏေငယ်ကို အရိယာဖြစ်သော လူ ဒါယကာ၊ ဒါယိကာမများနှင့်တကွ ဗြဟ္မာ၊ သိကြား၊ နတ်တို့ အားလုံးကပင်လျှင် ရှိခိုး ပူဇော်ခြင်းငှာ ထိုက်သည်ဟု မိန့်ကြားတော်မူခဲ့ခြင်း ဖြစ်ပါ၏။ထိုသို့ ရတနာသုံးပါးတွင် တစ်ပါးအပါအ၀င် ဖြစ်သည့် သံဃာရတနာတော်မြတ်ကို ဦးခေါင်းထက်မှ ဆံပင်ကိုများ မိစ္ဆာနတ်က ပြောင်အောင်နုတ်သတဲ့။ လူသူလေးပါး ကြား၍မှ လျော်ကန်ပါ၏လော။
“ဒီလိုဆိုရင်ဖြင့် ဒီအစွဲတွေကို ကျွတ်အောင်ချွတ်ဖို့ ကယ်သူဝေးကြပြီပေါ့ ဘုရား”ဟု ၀မ်းနည်းပက်လက် တင်လျှောက်မိရာ ဦးပဉ္စင်းက “မဝေးပါဘူး ဒကာရဲ့ ၊ ရှိပါတယ်”
“ဘယ်သူများလဲ ဘုရား”
“အထက်ကျောင်း ဘုန်းကြီးလေ”
ဦးပဉ္စင်းမိန့်မှ သတိရမိတော့သည်။ အထက်ကျောင်းဘုန်းကြီးဆိုသည်မှာ ရွာနှင့်ခပ်လှမ်းလှမ်းရှိ တောရကျောင်းတွင် သီတင်းသုံးနေသော ဘုန်းတော်ကြီးဖြစ်၏။ တောကျောင်းတွင် ကျောင်းထိုင်၍ နေခြင်းကြောင့် တောကျောင်းဘုန်းကြီးဟု ခေါ်ဝေါ်နေကြသော်လည်း သက်တော်မှာ ငယ်ငယ်ပင်ရှိသေး၏။ နမ္မားမြို့ ၊ မြို့မကျောင်းတိုက်၌လည်းကောင်း၊ မန္တလေးမြို့ ၀ိသုဒ္ဓါရုံကျောင်းတိုက်၌လည်းကောင်း ပရိယတ္တိစာပေများ သင်ယူဆည်းပူးခဲ့သဖြင့် စာပေဗဟုသုတ ကြွယ်ဝပြီး ၀ိဘဇ္ဇဥာဏ် ထက်သန်တော်မူသည့် အပြင် ရိပ်သာတရားစခန်းဝင်၍ ပဋိပတ္တိကိုလည်း လက်တွေ့အားထုတ်တော်မူခဲ့သည်။ ဓမ္မာစရိယတန်း အရောက်တွင် ဤယခုလက်ရှိတောကျောင်းဘုန်းကြီး ပျံလွန်တော်မူ၍ အဝေးရောက်အစ်ကိုတော်လည်း ဖြစ်သော ဆရာတော်၏ “ရွာကိုပြန်၍ သာသနာပြုပါ” ဟူသော သြ၀ါဒကို ဦးထိပ်ပန်ဆင်ကာ ဤတောကျောင်းသို့ လာရောက်ကျောင်းထိုင်ရခြင်း ဖြစ်သည်။ ရောက်စတွင် ငယ်ရွယ်သူဖြစ်သည့် အားလျော်စွာ တောကျောင်း၌ မပျော်မွေ့သော်လည်း နေရမည့်အတူတူ ကိုယ်တိုင်နှင့်တကွ အများအကျိုးရှိအောင်နေမည်ဟု ဆုံးဖြတ်တော် မူဟန်တူသည်။ နွေရာသီတွင် ကလေးငယ်များကို ဗုဒ္ဓဘာသာယဉ်ကျေးမှုသင်တန်း ပို့ချပေးသည်။ လူလတ်ပိုင်းများကို ဓမ္မစကြာဝတ်အသင်းများ ဖွဲ့စည်းစေသည်။ သာရေး နာရေးရှိ၍ တရားဟောခွင့်ကြုံ လျှင်လည်း အယူအမြင် စင်ကြယ်ရေး တရားတော်များကို ဦးစားပေး၍ ဟောသည်။ အငယ်တန်း၊ အလတ်တန်း၊ အထိလည်း စာချပေးသည်။
“အထက်ကျောင်းဘုန်းကြီးက အယူမှား၊ အစွဲမှားများကို ထောက်ပြပြီး အမှန်တရားတွေ သက်ဝင်လာအောင် ပြုပြင်ရေးတရားတွေ ဟောပါတယ် ဒကာရယ်။ ဒါပေမယ့် လူတွေက ခက်တယ်။ တစ်ချို့က အဲဒီလို ဟောတာကိုပဲ သူတို့အစွဲတွေ ထိခိုက်ရမလားဆိုပြီး အထက်ကျောင်းဘုန်းကြီ နတ်နှောက်လို့ ရူးနေပြီလို့ ပြောကြသေးတယ်”
“အလိုလေး ဘုရားဘုရား ။ မကြားဝံ့ မနာသာတွေပါလား။ တကယ့်သေနတ်ကျည်ဆံကမှ တစ်ခါမှန်လျှင် တစ်သက်တစ်ဘ၀သာ သေရမည်။ ပါးစပ်ကျည်ဆန်ကတော့ တစ်ခါမှန်လိုက်ပြီ ဆိုမှဖြင့် ဘ၀များစွာ သံသရာ တစ်လျှောက် ခံပေးဦးရော့ ”
“သိပ်လဲ စိတ်မပူပါနဲ့ ဒကာရယ်။ ဘယ်သူတွေ ဘာပြောပြော အထက်ကျောင်းဘုန်းကြီးက လက်လျှော့မှာ မဟုတ်ပါဘူး။ အခုတောင်မှ ရွာကျောင်းကိုလာပြီး ၀ိပဿနာတရားစခန်းဖွင့်ဖို့ စီစဉ်နေလေရဲ့။ အစပိုင်းတော့လဲ လူအို လူမင်းတွေနဲ့ပေါ့။ တဖြည်းဖြည်းတော့ လူလတ်ပိုင်းနဲ့ လူငယ်တွေကိုပါ စည်းရုံးနိုင်ပါလိမ့်မယ်”
ဦပဉ္စင်းက ဤသို့ မိန့်မှပင် ကျွန်တော် စိတ်သက်သာရာ ရသွားပါသည်။ “စိတ်ရှည် ဇွဲသန်၊ သည်းညည်းခံ၊ ပြုရန် သာသနာ” ဟု ဆိုသည့်အတိုင်း မိမိကို မှိုချိုး မျှစ်ချိုးပြောသော်လည်း စိတ်နာ စိတ်ပျက်တော်မူခြင်း မရှိဘဲ အမျိုး၊ ဘာသာ၊ သာသနာကို စောင့်ရှောက်တော်မူသည့် အရှင်မြတ်အား လေးစားကြည်ညိုမိသည်နှင့်အမျှ အရှင်မြတ်၏ သာသနာပြုလုပ်ငန်းကြီး အောင်မြင်ပါစေ၊ အရှင်မြတ်လို သာသနာ့ အာဇာနည်များ များများကြီး ပေါ်ထွန်းလာပါစေဟုသာ အကြိမ်ကြိမ် ဆုတောင်းလိုက်မိပါတော့သည်။

လင်းဦး ( စိတ်ပညာ )


သသာနာတော်အရေးတွေးပေးပါ(၃)

အခုတလော ထေရ၀ါဒသာသနာတော်အတွက်ရည်စူးပြီးတော့ စာရေးဖြစ်တယ်၊ တကယ်လိုအပ်နေတယ်လို့ ခံစားမိလို့ပါ၊ ဘုရားပြောတာတမျိုး၊ လိုက်လုပ်တာကတမျိုး၊ တလွဲစီဖြစ်တာတွေ တွေ့နေရတာများတော့၊ သိသလောက်လေးကို ဝေမျှယုံပေးပါ၊ သိလွန်းတတ်လွန်းလို့တော့ မဟုတ်ဘူး၊ မှားတာတွေဟာ ကြာလာရင် အမှန်ဖြစ်သွားတတ်တယ်။ အခုကျွန်တော်တို့တိုင်းပြည်မှာက ဗုဒ္ဓ၀ါဒရဲ့ အခြေခံလိုအပ်ချက်တွေကို စေ့စေ့ငှငှ လေ့လာဖို့ အရမ်းလိုအပ်နေပါပြီလို့ဆိုရင် ရယ်(ရီ)ကြမလားဘဲ။ စဉ်းစားကြည့်ပါ … ၀ိပဿနာ တရားစခန်း တိုင်းမှာ လူတွေ အရမ်းကိုများပါတယ်။ တရားစခန်းကထွက်တဲ့အခါ ဒီလူတွေရဲ့ နှလုံးသားတွေ ပြောင်းလဲ သွားကြပါသလား ? ဘာကြောင့် အဲလိုဖြစ်ရတာလဲ ? တရားရဲ့ဂုဏ်တော်ထဲမှာ `အကာလိကော´ `အခါမလင့် အကျိုးပေး၏´ ဆိုတဲ့ ဂုဏ်တော်ပါပါတယ်။ အဲဒီတရားရဲ့ အကျိုးကိုရော တကယ်ခံစားခဲ့ရပါသလား ? ရှိတော့ ရှိပါလိမ့်မယ်။ ရှားပါတယ်။ နှလုံးသားထဲတွင် တကယ့်တရား မကိန်းအောင်းသ၍ နှလုံးသားကိုပြောင်းလဲစေရန် မစွမ်းဆောင်နိုင်ပါ။ လှူတန်းတဲ့နေရာမှာလည်း တကယ်လိုအပ်နေသော နေရာများ၊ ပုဂ္ဂိုလ်များကို မျက်ကွယ်ပြု၍ ရေများရာရေလျှံကာ လှူဒါန်းနေကြသည်ကို တွေ့ရပါသည်။ အလှူ့ရှင်တော်တော်များများသည် ကားစီး၍ သွားနေသော နာမည်ကြီးသည့် သံဃာတော်အရှင်သူမြတ်များကိုသာလှူဒါန်းချင်ကြပါသည်။ ကျောင်းတိုက် အတွင်း နေထိုင်၍ စာပေများကိုသင်ကြားနေသော၊ သာသနာ့ဝန်ကို မိမိနိုင်သည့်ဘက်မှ ကျေပွန်စွာ ထမ်းဆောင်လိုသော ဆင်းရဲသည့်သံဃာတော်များကိုလည်း မမေ့သင့်ပါ။ ကျွန်တော်သည် ဤသို့ စာပေသင်ကြား နေသော ဆင်းရဲသည့် သံဃာတော်များကို မြင်ရသည့်အခါ အလွန်တရာ ၀မ်းနည်းမိပါသည်။ ဥပသကာ၊ ဥပသကီများအနေဖြင့် ဘတ်(စ်)ကားတိုးစီး၊ ဝေးလံသောခရီးများကို ခြေလျင်ကြွမြန်း၍ ဆွမ်းတစ်နပ် ရရန်အတွက် အားသွန်ခွန်စိုက်ပြီး ကြိုးစားနေရသော သံဃာတော်များကိုလည်း မပင်ပန်းရအောင် စောင့်ရှောက် သင့်ပါသည်။ မြတ်ဗုဒ္ဓသည် လောကမှ လွတ်မြောက်ကြောင်းဖြစ်သော လောကုတ္တရာတရားများကိုသာ ဟောကြားခဲ့သည်မဟုတ်။ လောကီလူ့ဘောင်မှ လူသားများအတွက် ကျင့်သင့်ကျင့်ထိုက်သော လူ့ဝတ္တရားများကို ဟောကြားခဲ့ပေသည်။ သို့တိုင်လျက် ကျွန်တော်တို့လူ့ဘောင်မှလူသားများ မေ့နေကြသည်လော ? မသိ၍လော ? ဟောပြောဆုံးမမည့်သူ မရှိ၍လော ? ထိုဝတ္တရားများကို မကျင့်ကြတော့သည်ကို တွေ့ရသည်မှာ ၀မ်းနည်းဖွယ် ကောင်းပါသည်။ မိဘ၀တ်ကို ရသော မိဘများ၊ ဘယ်နှယောက် ကျန်သေးသနည်း။ ထိုမိဘတို့သည် ဘုရားဟော ခဲ့သော မိဘ၀တ္တရားအတိုင်း ကျင့်ခဲ့ကြသည်လော ? အလားတူပင် သားသမီးတို့သည်လည်း ဘုရားဟောသည့် သားသမီးကျင့်ဝတ်အတိုင်း မိဘအပေါ် ကျင့်ရကောင်းမှန်း မသိကြတော့ချေ။ အလားတူပင် ဆရာကျင့်ဝတ်၊ တပည့်ကျင့်ဝတ်၊ အကြီးအကဲကျင့်ဝတ်၊ အလုပ်သမားကျင့်ဝတ်၊ အလုပ်ရှင်ကျင့်ဝတ်တို့ကို မည်မျှ လိုက်နာနေကြ သနည်း။ ယခု ထေရ၀ါဒနိုင်ငံဟုဆိုသော ကျွန်တော်တို့နိုင်ငံ၌ပင်လျှင် ထိုကျင့်ဝတ်တရားတို့သည် ပျောက်ကွယ် နေပါ၏။ သို့ဖြစ်လျှင် ထေရ၀ါဒသာသနာတော် တည်တံ့ပြန့်ပွားရေးအတွက် ထိုကျင့်ဝတ်သိက္ခာတို့ကို ပြန်လည် အသက်သွင်းတည်ဆောက်ရန်လိုအပ်ပါကြောင်းကို မျှဝေခံစားရင်း … … … … ။
နှလုံးစိတ်ဝမ်းငြိမ်းချမ်းကြပါစေ …. ။

Tuesday, January 29, 2008

စာရေး သူသည် ဗမာဖြစ်၏။ အမိဗမာ၊ အဖဗမာ၊ အဘိုးအဘွားအားလုံး ဗမာဖြစ်သော စာရေးသူသည် ဤမြေမှာနေ ဤရေကိုသောက်၍ ကြီးပြင်းလာသူတစ်ယောက်အနေဖြင့် နိုင်ငံကိုချစ်၏။ လူမျိုးကိုချစ်၏။ လူမျိုးဟုဆိုရာ၌ တိုင်းပြည်အတွင်းနေထိုင်သော တိုင်းရင်းသားအားလုံးကို ဆိုလိုပါသည်။ ထို့ထက် ပို၍ ဘိုးစဉ်ဘောင်ဆက် အမွေခံရရှိခဲ့သော ယဉ်ကျေးမှုအတတ်ပညာနှင့် သာသနာတော်ကို မြတ်နိုး၏။
ဤမြေမှာနေ၊ ဤရေကိုသောက်၍ ကြီးပြင်းခဲ့ရသော သူတို့အတွက် တိုင်းပြည်၏ ကျေးဇူးသစ္စာကို စောင့်သိရပါမည်။ တိုင်းပြည်၏အကျိုးကို မိမိနိုင်သည့်ဘက်မှ ဆောင်ရွက်ရပါမည်။ မဟုတ်လျှင် ကျေးဇူးကန်းသူသာဖြစ်၏။ ကျေးဇူးကန်းခြင်းသာဖြစ်သည်။ ကျေးဇူးသိခြင်းသည် ကတညုတမင်္ဂလာဖြစ်၏။ သို့ဖြစ်၍ ကျေးဇူးကန်းခြင်းသည် ကတညုတမင်္ဂလာကိုပျက်စေသောကြောင့် အဓမ္မ၀ါဒဖြစ်သည်။ ထိုကြောင့် ကျေးဇူးကန်းသူကို အ ဓမ္မ၀ါဒီ မိစ္ဆာဒိဋ္ဌိဟုခေါ်ဆိုနိုင်ပါသည်။
မည်သည့်ဘာသာအယူဝါဒကို ကိုးကွယ်သည်ဖြစ်စေ ကျေးဇူးကန်းသူသည် မှားယွင်းသောအယူကို ဆုပ်ကိုင်၍ အဓမ္မလမ်းကြောင်းကို လျှောက်လှမ်းနေကြသူများဟု ဆိုပါသည်။ စာရေးသူ၏ ပထမဆောင်းပါးမှ ထေရ၀ါဒအုတ်မြစ်ဟူသည် ကိုယ်ကျင့်သိက္ခာသာလျှင်ဟု ရေးခဲ့ပါ၏။ ဂေါတမမြတ်စွာဘုရားသည် လွန်ခဲ့သောနှစ်ပေါင်း ၂၅၀၀ ကတည်းက ထေရ၀ါဒကို တည်ဆောက်ခဲ့၏။ ယခု ၂၅၀၀ ကျော်ခဲ့ပြီဖြစ်၏။ တိတိကျကျဆိုရလျှင် ၂၅၅၁ ရှိခဲ့ပြီဖြစ်သည်။ မြတ်စွာဘုရား၏ ၀ါဒက အနတ္တ၊ မဇိမဒေသတွင် အတ္တကိုဖယ်၍ အနတ္တတံခွန်ကိုလွင့်ပြီး၊ မြတ်စွာဘုရားထူထောင်ခဲ့သော ထေရ၀ါဒသာသနာတော်သည် အန္ဒိယနိုင်ငံမှစခဲ့၏။
အေဒီ(၁)ရာစုမှစ၍ အိန္ဒိယနိုင်ငံသားတို့သည် အရှေ့ဘက်တလွှား နယ်ချဲ့ခဲ့၏။ အေဒီ(၉)ရာစုတွင် စုမတ္တရာအင်ပိုင်ရာကို တည်ထောင်ပြီးဖြစ်သည်။ ထိုအထဲတွင် အင်ဒိုချိုင်းနားကျွန်းဆွယ်တစ်ခုလုံးပါ၏။ မလေးရှား၊ ကမ္ဘောဒီးယား၊ ထိုင်း စသည်တို့သည် ထိုခေတ်မှ ဗုဒ္ဓဘာသာနိုင်ငံများဖြစ်ကြောင်း အထောက်အထားခိုင်လုံစွာသိရ၏။ ယခုမူ ထေရ၀ါဒငါးနိုင်ငံသာ။ ထိုငါးနိုင်ငံ၌ပင် ထေရ၀ါဒအုတ်မြစ် အမှန်တကယ် ခိုင်နေပါ၏လော။
သမိုင်းအရ မြန်မာနိုင်ငံ၏ ထေရ၀ါဒအုတ်မြစ်ကို ပုဂံခေတ်မှချသည်ဆိုဦး (မှတ်ချက်-ထို့ထက် စောစီးစွာ ရောက်နေကြောင်း အထောက်အထားနဲ့ တင်ပြရန် ကြိုးစားနေသည်) နှစ်ပေါင်း ၁၀၀၀ နီးနေပါပြီ။ အမှန်တကယ် ခိုင်မာသော ထေရ၀ါဒအုတ်မြစ်ကို စာရေးသူတို့ ချနိုင်ပါပြီလော။ ကိုယ်ကျင့်သိက္ခာကိုအခြေခံ၍ လောကမှ လွန်မြောက်ရာ ၀ိမုတ္တိကို ညွှန်ပြတော်မူခဲ့သော မြတ်စွာဘုရား၏ အဆုံးအမကို အမှန်တကယ် လိုက်နာမည်ဆိုပါက မိမိပုဂ္ဂိုလ်ရေးပိုင်ဆိုင်မှုထက်၊ ကိုယ်ကျင့်သိက္ခာကိုသာ ဦးစားပေးရပါမည်။ မြတ်စွာဘုရား၏ အဆုံးအမကို အတိအကျလိုက်နာနိုင်မှသာလျှင် ထေရ၀ါဒအုတ်မြစ်ခိုင်မာပါမည်။
သို့သော် … မိမိသည် မြတ်စွာဘုရား၏ အဆုံးအမကို မည်မျှလိုက်နာနေသနည်းဟု ပြန်ပြီးမေးရမလိုဖြစ်နေ၏။
ထို့အတွက် အားလုံးမှာ တာဝန်ရှိပါသည်။ အားလုံးဟုဆိုရာ၌ ရဟန်းလည်းပါ၏။ သီလရှင်လည်းပါ၏။ ဥပသကာ၊ ဥပသိကာမများလည်းပါ၏။ ထိုအဆိုပါ ပုဂ္ဂိုလ်တို့သည် မိမိတို့ဆိုင်ရာ တာဝန်များကို သိအောင်အားထုတ်ရပါမည်။ သိပြီးသည်နောက် လိုက်နာကျင့်ကြံနိုင်အောင် ကြိုးစားရပါမည်။ သို့မဟုတ်ပါက ထေရ၀ါဒသည် ရေတိမ်နက်ရပါလိမ့်မည်ဟု စကားဆိုရင်း …… ။
နှလုံးစိတ်ဝမ်း ငြိမ်းချမ်းကြပါစေ … ။

Friday, January 4, 2008

ထေရ၀ါဒ စံပေတံဖြင့် တိုင်းတာ၍

(၁)
ဓမ္မစွမ်းရည် အရှင်သုဝဏ္ဏနှင့် တွေ့ဆုံခြင်း
ကျွန်တော်သည် ရန်ကုန်မြို့ မဟာစည်သာသနာ့ရိပ်သာကြီးတွင် နှစ်လခန့်တရားအားထုတ်ဖြစ်ခဲ့ပါသည်။ တရား အားထုတ်ပြီးသောအခါ သုံးရက်ခန့်ရိပ်သာတွင် လေ့လာခွင့်ရပါသည်။ ထို့ကြောင့် သာသနဓဇသီရိပ၀ရဓမ္မာ စရိယ၊ ဒီဃနိကာယကောဝိဒ ဥဘတောဝိဘင်္ဂဓရ မင်းကွန်းတိပိဋကဓရ ဆရာတော်ဘုရားကြီး၏ စာပေဆုရ၊ မန္တလေးမြို့၊ သာသနတက္ကသိုလ်၊ သုတ္တန္တမဟာဌာန နာယက ပါမောက္ခဟောင်း အဆင့်မြင့် လောကုတ္တရာဆိုင်ရာ ဘွဲ့ထူး ဂုဏ်ထူးများဖြင့် စုံလင်သည့် ကမ္မာဋ္ဌာနာစရိယ ဓမ္မကထိက ဓမ္မစွမ်းရည်ဆရာတော် အရှင်သုဝဏ္ဏအား တွေ့ဆုံ ကြည်ညိုခွင့် ရခဲ့ပါသည်။
သို့တွေ့ဆုံစဉ် ထေရ၀ါဒ ဗုဒ္ဓဘာသာဝင်များအတွက် အယူအမြင် စင်ကြယ်ရေး၊ ကိုးကွယ်မှု စင်ကြယ် သန့်ရှင်းရေးများနှင့် ပတ်သက်၍ ဆရာတော်၏ ကြည်ညိုဖွယ်ရာ ရပ်တည်ဖြေဆိုချက်များအား ကျွန်တော်မေးမြန်း ကြားနာခဲ့ရသည်များကို ပြန်လည်း ဓမ္မဒါန ပြုလိုက်ပါသည်။

(၂)
သာသနပါပက အကျင့်များ
“ဆရာတော်ဘုရား၊ ရေဆွမ်းကိုသာ ဘုဉ်ပေးတယ်၊ သဲဆွမ်းကိုသာ ဘုဉ်ပေးတယ်၊ လေဆွမ်းကိုသာ ဘုဉ်းပေးတယ်ဆိုတဲ့ ပုဂ္ဂိုလ်ထူးတွေအကြောင်း ကြားနေသိနေရပါတယ် ဘုရား။ အဲ့ဒီပုဂ္ဂိုလ်တွေကို ထေရ၀ါဒ ရှု့ထောင့်ကနေကြည့်ရင် ဆရာတော် ဘယ်လိုမြင်ပါသလဲ ဘုရား။
“ရှင်းပါတယ် ဒကာရဲ့။ ဘယ်လိုရှင်းသလဲဆိုတော့ သုတ္တန်ဒေသနာ မဟာသီဟနာဒသုတ်မှာ သာသန ပါပတွေရဲ့ အကျင့်တွေကို ဟောကြားထားခဲ့တာပဲ ”
“မှန်ပါ ဘုရား ”
“ဘယ်လိုဟောကြားခဲ့သလဲဆိုတော့ အဲဒီပုဂ္ဂိုလ်တွေဟာ အ၀တ်အထည်ကို မ၀တ်ကြဘူးတဲ့။ နောက် သဒ္ဓါမျက်လုံး ကန်းနေကြတဲ့ အန္ဓပုထုဇဉ်တွေကို အထူးအဆန်းထင်ပြီး အရူးအနှမ်းကိုးကွယ်လာကြအောင် သူတို့ဟာ သစ်ရွက်စိမ်းတွေကို စားပြကြတယ်တဲ့။ ဆန်စိမ်းတွေကိုလည်း စားပြကြတယ်။ ပြီးတော့ ဆန်ကွဲ၊ ထမင်းဂျိုးတွေကိုလဲ စားပြတယ်။ နှမ်းဖတ်၊ မြက်၊ တောသစ်မြစ်၊ သစ်သီးတွေချည်းပဲလဲ စားပြတဲ့အပြင် နောက်ဆုံး ကျင်ကြီးအထိ စားပြပြီး ထူးဆန်းအောင် လုပ်ပြကြပါတယ်တဲ့ ”
“ သြော် တင်ပါ့ဘုရား ”
“ ဒီတော့ မဟာသီဟနာဒသုတ်နဲ့ တိုင်းတာပြောရရင် သဲဆွမ်း၊ ရေဆွမ်း၊ လေဆွမ်းကိုသာ ဘုဉ်းပေးတယ်၊ စာသောက်တယ်ဆိုတဲ့ သူတွေဟာ အထူးအဆန်းဖြစ်အောင်၊ အရူးအနှမ်းကို ကိုးကွယ်တတ်ကြတဲ့သူတွေ များပြားလာအောင် ဗန်းပြတဲ့ သာသနပါပ အကျင့်တွေကို ကျင့်ပြနေတာပဲ။ ဘုရားပြောတဲ့ အကျင့်မြတ် အပြင်ဘက်ကဆိုတာ ထင်ရှားနေတာပါပဲ”

အကျိုးမရှိသော အကျင့်ဆန်းများ
ဓမ္မစွမ်းရည်ဆရာတော် အရှင်သုဝဏ္ဏ၏ ဖြေကြားချက်များမှာ ရှင်းလင်းတိကျလှပါ၏။ သုတ္တန်ဒေသနာလာ မဟာသီဟနာဒသုတ္တန်နှင့် နှိုင်းချင့်ကြည့်လေသော် ထိုထို ရေဆွမ်း၊ သဲဆွမ်း၊ လေဆွမ်းကို စားသည်ဆိုသော ပုဂ္ဂိုလ်များ၏ အကျင့်များကား သာသနပါပမှ အကျင့်များ ဖြစ်နေပေသည်။ ထိုအကျင့်ဆန်းများကို ဘုရားရှင်သည် လွန်ခဲ့သော နှစ်ပေါင်းနှစ်ထောင့်ငါးရာကျော်ကာလမှစ၍ အတ္တကိလာမထာနုယောဂကျင့်စဉ်ဟု ပစ်ပယ်ရှုတ်ချခဲ့ပြီး ဖြစ်လေသည်။
အဘယ်ကြောင့် ထိုအကျင့်များကို ဘုရားရှင် ပစ်ပယ်ခဲ့ပါသနည်း။ ထိုအကျင့်များသည် လောဘ၊ ဒေါသ၊ မောဟ စသည့် ကိလေသာအညစ်အကြေးများ ကင်းဝေးသန့်ရှင်းစင်ကြယ်စေကြောင်း အကျင့်များမဟုတ်သောကြောင့် ပင် ဖြစ်ပါသည်။ အစွန်းရောက်ကျင့်ကြံခြင်းများ ဖြစ်သောကြောင့်လည်း ကိုယ်နှုတ်နှလုံးသုံးပါးကို ယဉ်ကျေး သိမ်မွေ့စေနိုင်သော အကျင့်မြတ်များလည်း မဟုတ်ကြပေ။
ကုသလ အန၀ဇ္ဇ အပြစ်မရှိ ချမ်းသာရာရကြောင်း ကုသိုလ်လမ်းကြောင်းများလည်းမဟုတ်ပါပေ။ ထို့ကြောင့် ဘုရားရှင်က ပစ်ပယ်ခဲ့ခြင်းဖြစ်ပါသည်။ သြော် ထိုထိုသော အကျင့်ထူးအကျင့်ဆန်းများကို ဘုရားအစရှိသည့် သူတော်ကောင်းကြီးများ ပစ်ပယ်တားမြစ်တော်မူထားပါလျက် ထပ်မံကျင့်ကြံနေကြပြန်သည်။ ထိုအကျင့်များကို လက်ခံကြည်ညိုနေကြပြန်သည်ဆိုတော့ ယင်းပုဂ္ဂိုလ်များကား ထေရ၀ါဒ အ၀န်းအ၀ိုင်းမှ စာရင်းဝင်များကား မဟုတ်တန်ရာ၊ သာသနပါပ ပုဂ္ဂိုလ်များသာ ဖြစ်ပေမည်ဟု ကျွန်တော်တို့ သိရှိနားလည်ထားကြရမည်သာ ဖြစ်ပါသည်။
ယခုကဲ့သို့ သူတို့အကြောင်း ရေးသားဖော်ပြနေရခြင်းမှာလည်း ထိုပုဂ္ဂိုလ်များက သာသနာအတွင်း အယောင်ဆောင် လှည့်စားနေပါသဖြင့် ထေရ၀ါဒ အ၀န်းအ၀ိုင်းနှင့် ခြားနားစေရန် စည်းတားပေးခြင်းသာ ဖြစ်ပါသည်။

(၃)
ရာထူးစည်းစိမ်ဥစ္စာများ တိုးတက်ကြီးပွားစေပါသလား
“အရှင်ဘုရား ၊ သူတို့က ဆိုကြပါသေးတယ်။ ဘယ်ဂါထားရွတ်၊ ဘယ်အရာကို ပုတီးစိပ်ပါဆိုရင် ရာထူးတိုးတက် စေရမယ်၊ ကြီးပွားချမ်းသာလာစေရမယ်လို့ အတိအလင်းပြောဆိုနေကြတဲ့ အချက်ကိုကော ဘုရား”
“အဘိဓမ္မာမှာ စိတ်ဟာ လက်ဖျောက်တစ်တွတ်အချိန်မှာ ကုဋေတစ်သိန်းကျော့ဖြစ်တယ်လို့ ဆိုတယ်။ ဒါကို ရှင်းအောင် မိလိန္ဒပဥှာနဲ့ပြောရရင်တော့ လက်ဖျောက်တစ်တွတ်စာမှာ စိတ်ဟာ စပါးတင်းရှစ်ဆယ်ဆံ့တဲ့ လှည်းအစီးတစ်ရာလောက် အစုလိုက် အပုံလိုက် ဖြစ်တယ်။ ဆိုလိုတာက လက်ဖျောက်တစ်တွတ်စာမှာ စိတ်တွေဟာ အနီးစပ်ဆုံး စပါးတင်းပေါင်း တစ်သောင်းပုံကြီးလောက်နီးနီး ဖြစ်တယ်ပေါ့။ အဲ့ဒီမှာ ရာထူးတိုးချင်၊ စီးပွားဖြစ်ချင်တဲ့ လောဘစိတ်နဲ့ ဂါထာရွတ်၊ ပုတီးစိပ်နေတယ်ဆိုတော့ လောဘဆိုတဲ့ အကုသိုလ်ဦးစီးတဲ့ စိတ်တစ်ကြိမ် ဖြစ်တိုင်းဖြစ်တိုင်း စပါးတင်းတစ်သောင်းပုံလောက်နီးနီး ဖြစ်ဖြစ်နေတယ်ပေါ့။ ဒီတော့ ဂါထာ ရွတ်စဉ် စိတ်အစဉ်အကြိမ်တွေများစွာ ဖြစ်နေမယ်ဆိုတော့ စဉ်းစားသာ ကြည့်ပေတော့ ။ လောဘ အကုသိုလ်တွေ ဘယ်လောက်ဖြစ်နေမလဲဆိုတာ ဧရာမလောဘအပုံကြီး ဖြစ်နေပြီပေါ့။ ရွတ်တဲ့ဂါထာက ဘုရားဟောပါလို့ ပါရှိခဲ့ရင် ကုသိုလ်ကတော့ နည်းနည်းတော့ပါမှာပေါ့။ သန့်သန့်ရှင်းရှင်း ကုသိုလ်တော့ မဟုတ်ပါဘူး။ တကယ်က ရာထူးတိုးချင် ရာထူးတိုးတက်ကြောင်း၊စီးပွားတိုးတက်ချင်ရင် စီးပွားတိုးတက်ကြောင်း အလုပ်တွေကိုသာ ကြိုးကြိုးစားစားလုပ်ပေါ့။ ဒါမှ ရာထူးတို့၊ စီးပွားတို့ဆိုတာ တိုးတက်လာမှာပေါ့။ အင်း...ထိုင်ပုတီးစိပ်၊ ဂါထာရွတ်နေရုံနဲ့တော့ ဘယ်ရာထူး၊ ဘယ်စီးပွားမှ တက်မလာနိုင်ပါဘူးလေ။ ဘာဖြစ်လို့လဲဆိုတော့ အလုပ်က လမ်းလွဲနေလို့ပဲလေ။

အကြောင်းကြောင့် အကျိုးဖြစ်
မှန်ပါ၏။ ဆရာတော် အမိန့်ရှိသကဲ့သို့အလုပ်ဟူသောအကြောင်းတရားကို မပြုလုပ်ပါဘဲ အကျိုးဟူသော ကျေးဇူးခံစားရခြင်းများသည် လုံးဝဖြစ်ပေါ်လာ၍ မလာနိုင်ပါ။ အသီးကိုစားလိုလျှင် အပင်ကို စိုက်ပျိုးရပါမည်။ အကြောင်းမပြုလုပ်ပဲလျက် အကျိုးတရားဟူသည် ဖြစ်ပေါ်၍ မလာနိုင်ပါ။

(၄)
ထေရ၀ါဒ စံပေတံနှင့် တိုင်းတာ၍
ကျွန်တော်တို့ ထေရ၀ါဒဟူသော ဗုဒ္ဓဘာသာဝင်တို့သည် ဒီလိုကြား၊ ဟိုလိုကြား၊ ဒီလိုမြင်၊ ဟိုလိုမြင်တိုင်း မျက်ကန်းသဒ္ဓါဖြင့် မယုံသင့်ကြပါချေ။ ဝေဖန်စီစစ်တတ်သော ၀ိဘဇ္ဇ၀ါဒီများပီပီ ဝေဖန်စိစစ်ပိုင်းခြား ကြည့်ကြရ ပေမည်။ သို့ ဝေဖန်ပိုင်းခြားကြည့်ရာတွင် ဘုရားအစရှိသည့် အရိယာသူတော်ကောင်းကြီးတို့၏ လမ်းကြောင်းနှင့် ညီမညီ၊ ဓမ္မ၀ိနိယနှင့် ကိုက်မကိုက်၊ သီလ၊ သမာဓိ၊ ပညာသို့ ဆိုက်မဆိုက် ထေရ၀ါဒ စံပေတံဖြင့် ထောက်ချင့်တိုင်းတာ ကြည့်ကြရပေမည်။
တိုင်းတာကြည့်ရာတွင် ရဟန်းပညာရှိ၊ လူပညာရှိများ ရေးသားထားသော ပါဠိမြန်မာပြန်စာပေများစွာ အားထားရာ ရှိနေပါသည်။ ထိုစံများဖြင့် တိုင်းတာကြည့်ပြီး ကိုက်ညီလျှင် ကိုးကွယ်ရာအဖြစ်ယူ၍ မကိုက်ညီပါက ပါပ၀ါဒများသာဟု မှတ်ယူကာ ရှောင်ကြဉ်တားဆီးကြရမည်သာ ဖြစ်ပါတော့သည်။
လင်းဦး ( စိတ်ပညာ )


Thursday, January 3, 2008

နမောဝိမုတ္တာနံ
လွတ်မြောက်သူတို့အားရှိခိုးပါ၏။
နမောဝိမုတ္တိယာ
လွတ်မြောက်ခြင်းဥာဏ်အားရှိခိုးပါ၏။
ဝိမုတ္ထိ၏အဓိပါယ်မှာလွတ်မြောက်ခြင်းဖြစ်၏။သတ္တ၀ါတို့သည်
လောကအနှောင်အဖွဲအမျိုးမျိုးဖြင့် နှောင်ဖွဲ့ခြင်းခံနေကြရ၏။သူတို့သည်အနှောင်အဖွဲ့အမျိုးမျိုး
ဖြင့်နှောင့်ဖွဲ့ခြင်းခံရပြီး မလွပ်လပ်သောအခါမှစပြီး လွပ်လပ်ခြင်းဝိမုတ္တီဟူသောစကားလုံးကို သုံးစွဲလာကြ၏။အနှောင်အဖွဲ့သည်အဘယ်မျှကြပ်တည်းပြီး
ဆင်းရဲဒုက္ခရောက်သနည်း။ထိုနှင့်အမျှပင်ဝိမုတ္တိသည်လွတ်မြောက်ပြီးချမ်းသာသုခမြင့်မောက်လေသည်။
ဗုဓစာပေတွင်ဝိမုတ္တိဟူသောစကားလုံးကိုအနှံ့အပြားတွေ့နိုင်၏။ပဋ္ဌမသံဂါယနာတင်အရှင်တို့သည် ထိုစကားလုံးကိုအသဲနှလုံးသို့ရောက်အောင်အကွက်ဖော်အရောက်တင်ပေးလိုက်၏။အရှင်မဟာကသပအမှူးရှိသောရဟန္တာအရှင်အမြတ်တို့သည်မြတ်စွာဘုရား၏စကားတော်တို့ကိုသံဂါယနာတင်ကြပြီးဝေဖန်ပိုင်းခြားမှတ်သားကြလေသည်။
မြတ်စွာဘုရားသည်အတုမရှိသောသမ်ဗောဓကိုသိတော်မှုပြီးမဟာပရိနိဗာန်ပြုတော်မူသည်၏။အကြားတွင်လေးဆယ်ငါးနှစ်တို့ပတ်လုံးးကံဖြစ်တော်မူသော်၊ဆင်ခြင်တော်မူသဖြင့်
့်ဟောတော်မူသောတရားအလုံးအစုံသည်တစ်ခုတည်းသောရသရှိ၏။ဝိမုတ္တိရသသည်သာလျှင်ဖြစ်၏။
(ဦးသောဇင်၏၀ိမုတ္တိရသမှကူးယူဖော်ပြပါသည်။)

လောကအလှ ဖန်တီးနိင်ကြပါစေ



တိရစ္ဆာန်စွမ်းအားဖြင့် လျှပ်စစ်အားထုတ်လုပ်နိုင်ကြောင်း ဂျာနယ်ကြီးတစ်စောင်တွင် သတင်းတစ်ပုဒ်ဖတ်လိုက်ရ သည်။

နွားများအား ထမ်းပိုးထမ်းစေ၍ ဆီဆုံကြိတ်သလို လည်စေကာ လျှပ်စစ်စွမ်းအင်ထုတ်ယူ၍ ကော်ဖီဖျော်စက်ဖြင့် ကော်ဖီ ဖျော်နိုင်ပြီ…………တဲ့။

နွားများကို မညာမတာ

တစ်ဖက်ကကြည့်လျှင် ဤမျှနှေးကွေးစွာလည်ပတ်ရုံမျှနှင့် လျှပ်စစ်စွမ်းအင် ထုတ်လုပ်လာနိုင်သည်ကို ၀မ်းမြောက်ရ မည်ဖြစ်သော်လည်း ထယ်ထွန်ခြင်း၊ စပါးနှယ်ခြင်း ၊ ဆီကြိတ်ခြင်း ၊ သောက်သုံးရေ ပစ္စည်းများသယ်ယူခြင်း၊ စသည့် လုပ်ငန်းများကို ခိုင်း၍မှ အားမရသေးဘဲ ၊ အားနေတယ်ဟုဆိုကာ တောင်သူလယ်သမား ဦးကြီးများ၏ အသက်သခင်ကျေးဇူးရှင်ဖြစ်သော နွားများကို အားလပ်ခွင့်မပေးဘဲ စက်ရုပ်ကဲ့သို့ အခိုင်းခံရမည့်အရေး တွေးပီး စိတ်ထဲမကောင်းဖြစ်မိသည်။

လောကလူသားများ ကိုယ်ချင်းစာနာတရားထားကာ မေတ္တာကရုဏာမကင်းသော လောက၏အလှကို ဖန်တီးနိင်ကြပါစေ။

ကလင် ကလင် ကလင် ဖုန်းမြည်သံကြောင့် ဖုန်းကိုင်လိုက်သောအခါ “ အရှင်ဘုရား…..တပည့်တော်တိုက်မှာ ထုတ်ဝေသူတစ်ယောက် ရောက်နေပါတယ်ဘုရား၊ အရှင်ဘုရားမှာ ရေးပီးသားဆောင်းပါးရှိရင် ပို့ပေးစေချင်ပါတယ်ဘုရား…၊ အရှင်ဘုရားနောက်ရေးမယ့် ဆောင်းပါးတွေမှာ ကလောင်နာမည် ပြောင်းရတော့မယ်ဘုရား၊ ယခုလက်ရှိ ကလောင်အမည်နဲ့ ရေးရင် ထည့်ပေးမှာ မဟုတ်ဘူး ဘုရား…၊ အရှင်ဘုရားနာမည်က အခု နာမည်ကြီးနေတဲ့ ဓမ္မကထိက ဆရာတော်ရဲ့ ဘွဲ့တော်နဲ့ တူနေလို့ပါဘုရား….၊” အော်…တို့များ နာမည်ကြီးချင်တော့………ကြံဖန်ပြီးနာမည်ကြီးတယ်နော်၊ ဘာကြောင့်လည်းဆိုရင် နာမည်က “ ကောဝိဒ” ဖြစ်နေလို့ပါတဲ့ဗျ……….။

လောကမှာ လူတူတာလည်းမရှားသကဲ့သို့ နာမည်တူတာလည်း ပေါများလှသည်။ နာမည်တူရုံမျှနဲ့ ထိုနာမည်မသုံးရ ဟု ဆိုလျှင် နာမည်တူသောသူများ အခက်တွေ့ရချေတော့မည်။ အခုနာမည်ကြီးဆရာတော်တွေက ငါးပါးဆိုတော့ ------

5 in 1 လုပ်လို့မရနိုင်ချေ။ 6 in 1 လုပ်မှာရနိုင်မည်။ ထိုထက်သေချာတာက 10 in 1 လောက်ဆို ပိုသေချာမည်ထင်သည်။ ဒါကြောင့် ယနေ့ကစပြီး နာမည်ကို 10 in 1 နာမည်ဆယ်မျုိုးမှည့်ကာ ထိုဆယ်မျိုးအနက်က ကင်းလွတ်ခွင့်ရတဲ့ နာမည်တစ်လုံးကို အမျိုးမျိုးပြောင်းသုံးခြင်းဖြင့် အန္တရာယ်အကင်းဆုံးနှင့် စိတ်အချရဆုံးဖြစ်ကြောင်း နာမည်ရှိကြသောသူများ အား မောင်းခတ်ကာ သတိပေးနိုးဆော်လိုက်ရပါတော့သတည်း။

Tuesday, January 1, 2008

ထေရ၀ါဒ ဗုဒ္ဓသာသနာ့အလံတော်၏ ပစ္စက္ခမြင်ကွင်း

ဗုဒ္ဓသာသနာတော်အလံသည် ထေရ၀ါဒ ဗုဒ္ဓသာသနာတော်၏ အထွတ်အထိပ်အဖြစ် အမှတ်တံဆိပ် ခတ်နှိပ် စီစဉ်ထားသည့် အလံတော်ဖြစ်ပေသည်။ အလံတော်ကို စီစဉ်ရာ၌ အရောင်(၆)မျိုးဖြင့် စီစဉ်ထားသည်။ အဆိုပါ(၆)မျိုးသော အရောင်တို့သည် ဗုဒ္ဓမြတ်စွာဘုရား အဖြစ်ကိုရရိ်ှတော်မူပြီးစ သတ္တာဟ (၇)ရက်၊ (၇)လီ စံတော်မူရာ၌ စတုတ္ထ သတ္တာဟဖြစ်သော ရတနာဃရ နတ်တို့ဖန်လာ ရတနာစံအိမ်တော်တွင် စံနေတော်မူ၍ အဘိဓမ္မာ ဒေသနာတော်မှ အနန္တနယသမန္တမည်ခေါ် မဟာပဋ္ဌာန်း ဒေသနာတော်ကို ဆင်ခြင်သုံးသပ်တော် မူသော်အခါ ဗုဒ္ဓဘုရား၏ ကိုယ်တော်မှ ထွက်မြူးတော်မူသည့် ရောင်ခြည်တော် ဖြစ်လေသည်။ ထိုရောင်ခြည်တော်(၆)သွယ်ကို ဦးထိပ်ထား၍ ဗုဒ္ဓသာသနအလံတော် အထိမ်းအမှတ်အဖြစ် စီစဉ်ရန် အကြံပြုသူမှာ ဗိုလ်မှူးကြီး ဟင်နရီစတီးလက်အိုလကော့ ဖြစ်လေသည်။ ဗိုလ်မှူးကြီး အိုလကော့သည် ၁၈၈၀ပြည့်နှစ် မှစ၍ သီဟိုဠ်(သီရိလင်္ကာ) နိုင်ငံတွင် ထေရ၀ါဒဗုဒ္ဓသာသနာပြန့်ပွားရေး ဆောင်ရွက်သူ ဖြစ်ပေသည်။
၁၈၈၅ခုနှစ်တွင် သီဟိုဠ်(သီရိလင်္ကာ)နိုင်ငံအစိုးရက ကဆုန်လပြည့်နေ့ကို ဗုဒ္ဓနေ့အဖြစ် သတ်မှတ်၍ အခမ်းအနား ကျင်းပရန် စီစဉ်ကြသည်။ ဤတွင် ဗုဒ္ဓနေ့အခမ်းအနား၌ လွှင့်ထူမည့် ဗုဒ္ဓအထိမ်းအမှတ် တံဆိပ်ခတ် သာသနာ့အလံတော် လိုအပ်နေပေသည်။ ထိုလိုအပ်ချက်ကို ဗိုလ်မှူးကြီးအိုလကော့က ဖြည့်ဆည်း ပေးလိုက်သည်။ ဗိုလ်မှူးကြီး အိုလကော့သည် ဗုဒ္ဓသာသနာ့အလံတော်အဖြစ် ဗုဒ္ဓမြတ်စွာဘုရား၏ ထူးခြားသော ရောင်ခြည်းတော်(၆)သွယ်ကို အခြေခံ၍ ပြုလုပ်ရန် အကြံပြုခြင်းဖြစ်ပေသည်။ ထိုအကြံပြုချက်ကို အကြောင်းပြု၍ ၁၈၈၅ခုနှစ်တွင် ပထမဦးဆုံးကျင်းပသည့် သီဟိုဠ် (သီရိလင်္ကာ)နိုင်ငံ၏ ဗုဒ္ဓနေ့ အခမ်းအနားတွင် စတင်အသုံးပြု လွှင့်ထူပူဇော်ခဲ့ပေသည်။ ၁၉၅၀ပြည့်နှစ်တွင် ကျင်းပသည့် ကမ္ဘာ့ဗုဒ္ဓဘာသာ ညီလာခံမှ အညီအညွတ် သဘောတူဆုံးဖြတ်၍ ရောင်ခြည်တော်(၆)သွယ်ဖြင့် စီစဉ်ထားသည့် ဗုဒ္ဓသာသနာ့ အလံတော်ကို ကမ္ဘာ့အ၀န်း၌ ဦးထိပ်တင်လွှင့်ထင်ပူဇော်ခဲ့ကြပေသည်။
ဗုဒ္ဓသာသနာ့အလံတော်ကို စီစဉ်ရာ၌ ဗုဒ္ဓရောင်ခြည်တော်၏ အရောင်(၆)မျိုးဖြစ်သော-
နီလ = အပြာရောင် (အညိုရောင်)
ပီတ = အ၀ါရင့်ရောင်
လောဟိတ = အနီရင့်ရောင်
သြဒါတ = အဖြူရောင်
မဉ္ဇိဠ = ပန်းနုရောင် (သပြေရောင်)နှင့်
ပဘဿရ = ငါးမျိုးရောယှက်အရောင် (ပြိုးပြိုးပြက်ပြက်အရောင်)
စသည်ဖြင့် အကန့်(၆)ကန့်ဖြင့် စီစဉ်ခြင်းဖြစ်သည်။ တစ်နည်းအားဖြင့်ဆိုသော် -
(၁) နီလ = အပြာရင့်ရောင် -ငြိမ်းချမ်းခြင်း အထိမ်းအမှတ်။
(၂) ပီတ = အ၀ါရင့်ရောင်-ဗုဒ္ဓသာသနာတော် အထိမ်းအမှတ်။
(၃) လောဟိတ = အနီရင့်ရောင်-ရဲရင့်ခြင်း အထိမ်းအမှတ်။
(၄) သြဒါတ = အဖြူရောင်- သန့်ရှင်းစင်ကြယ်ခြင်း အထိမ်းအမှတ်။
(၅) မဉ္ဇိဋ္ဌ = ပန်းနုရောင်- ဖြောင့်မတ်ခြင်း အထိမ်းအမှတ်။
(၆) ပဘဿရ = ငါးမျိုးရောယှက်အရောင်- စည်းလုံးညီညွတ်ခြင်း
အထိမ်းအမှတ်။
စသဖြင့်စီစဉ်ခြင်းလည်း ဖြစ်ပေသည်။
ကမ္ဘာ့ဗုဒ္ဓဘာသာညီလာခံ(၁၉၅၀)မှ အညီအညွတ်ဆုံးဖြတ်မှုဖြင့် ဖြစ်တည်လာခဲသည့် ဗုဒ္ဓဘာသာ သာသနာ့ အလံတော်ကိုပင် မြန်မာနိုင်ငံတွင် လက်ခံကျင့်သုံး ဦးထိပ်တင်လွှင့်ထူပူဇော်ခဲ့ကြသည်။ ၁၉၈၀ပြည့်နှစ်တွင် ကျင်းပသည့် သာသနာတော် သန့်ရှင်းတည်တံ့ပြန့်ပွားရေး ဂိုဏ်းပေါင်းစုံ သံဃအစည်းအဝေးမှလည်း ဗုဒ္ဓသာသနာ့ အလံတော်နှင့် ပတ်သက်၍ အညီအညွတ်ဆုံးဖြတ်ပြီး သံဃနာယက လက်စွဲကျမ်းတွင် ပြဋ္ဌာန်း ခဲ့သည်။ သံဃနာယက လက်စွဲ၊ အပိုဒ်(၅)၊ အခန်း(၂၉) အထွေထွေကဏ္ဍ၌ သာသနာ့အလံတော် အခန်း အပိုဒ်(၃၅၅)၌ အသုံးပြုရမည့်နေ့ရက်များ သတ်မှတ်ထားသည်မှာ-
(၁) ကဆုန်လပြည့်နေ့ - ဗုဒ္ဓနေ့။
(၂) နယုန်လပြည့်နေ့ - မဟာသမယအခါတော်နေ့
(၃) ၀ါဆိုလပြည့်နေ့ - ဓမ္မစကြာအခါတောနေ့
(၄) သီတင်းကျွတ်လပြည့်နေ့ - အဘိဓမ္မာအခါတော်နေ့
(၅) တန်ဆောင်မုန်းလပြည့်နေ့ - သာမညဖလအခါတော်နေ့ ဟူ၍ ဖြစ်သည်။

အပိုဒ်(၃၆၅)အသုံးပြုရမည့် အခမ်းအနားများကို ဖော်ပြထားရာတွင်-
(၁) ၀ါဆိုပွဲ
(၂) ကထိန်ပွဲ
(၃) အဘိဓမ္မာပွဲ
(၄) ရှင်ပြုပွဲ
(၅) ရဟန်းခံပွဲ
(၆) ဆွမ်းကြီးလောင်းလှူပွဲ
(၇) မဟာဘွဲ့နှင်းသဘင်
(၈) စူဋ္ဌဘွဲ့နှင်းသဘင်
(၉) ဘွဲ့တံဆိပ်ဆက်ကပ်ပွဲ
(၁၀) တိပိဋက စာမေးပွဲ၊ ပူဇော်ပွဲ
(၁၁) စာပြန်ပွဲ၊ ပူဇော်ပွဲ
(၁၂) ဗုဒ္ဓဘာသာစာမေးပွဲ၊ ပူဇော်ပွဲ
(၁၃) ခွင့်ပြုချက်ရရှိပြီသည့် တရားပွဲ
(၁၄) ဘုရားထီးတင်ပွဲ
(၁၅) ဗုဒ္ဓဇနိယပွဲ
(၁၆) သံဃအစည်းအဝေးပွဲ
(၁၇) အဘိဓမ္မာပဋ္ဌာန်းပူဇော်ပွဲ
(၁၈) နိကာယ်စာပြန်ပွဲ၊ ပူဇော်ပွဲ
(၁၉) ဗုဒ္ဓဘာသာရေးဆိုင်ရာသင်တန်း စသည်ဖြင့် ဖော်ပြထားသည်။

အပိုဒ်(၃၅၈) အသုံးပြုနည်းတွင် ဖော်ပြထားသည်မှာ-
အထိမ်းအမှတ်အလံအားလုံး၏အလယ်တွင် ဖြစ်စေရမည်။ လက်ယာအစွန်းမှ အရောင်ငါးမျိုး ရောယှက်ရောင်တွင် အပြာရင့်ရောင်သည် အပေါ်တွင်လက်ျာဘက်ရှိနေစေရမည်။ မော်တော်ယာဉ်တွင် စိုက်ထူပါက ကားကြီးများ၏ အမိုးအရှေ့ပိုင်းတွင် ဖြစ်ရမည်။ ကားငယ်များတွင် လက်ယာဘက် အရှေ့ပိုင်းတွင် ဖြစ်ရမည်။ သံဃာများကို ကြိုဆိုသည့်အခါ သံဃာပါလာသည့်အခါတွင်သာ တပ်ဆင်ရမည်ဟူ၍ ဖော်ပြ ထားသကဲ့သို့၊ အပိုဒ်(၃၉၅)အသုံး မပြုရသည့်အချိန်အခါနှင့်နေရာကို သတ်မှတ်ထားရာတွင်ကား-
(က) ရဟန်းသံဃာပါသည်ဖြစ်စေ၊ မပါသည်ဖြစ်စေ မည်သည့်ဘုရားဖူးယာဉ်တွင်မှ မသုံးစွဲရ။
(ခ) လမ်းဘေး၊ လမ်းခွ၊ ယာဉ်ဆိပ်၊ သင်္ဘောဆိပ်များတွင် မသုံးရဟူ၍ ဖြစ်လေသည်။

ယနေ့ ပစ္စက္ခဗုဒ္ဓသာသနာ့အလံတော်မြင်ကွင်းကား ဗုဒ္ဓဘာသာဝင်တစ်ဦးအနေဖြင့် ဘ၀င် မကျ ၀မ်းနည်းမိရ ပါသည်။ ဗုဒ္ဓသာသနာ့အလံတော်ကို သုံးစွဲနေကြသည်မှာ အရာဌာန ဆိုင်သည် မဆိုင်သည်ကို အလေးဂရုမပြု ပေါ့ပေါ့တန်တန်သုံးစွဲနေကြပေသည်။ ကျွန်တော် မကြာခဏ ကြုံတွေ့ရသည့် ဗုဒ္ဓသာသနာ့ အလံတော်ကို သုံးစွဲနေသည်များမှာ ဘုရားဖူး ယာဉ်များ၊ လမ်းဘေးဝဲယာ အလှူခံဌာနများသည် ဗုဒ္ဓသာသနာ့အလံတော်ကို တွင်တွင်ကျယ်ကျယ် သုံးနေကြပေသည်။ အချို့သောသူတို့မှာ ဗုဒ္ဓသာသနာ့အလံတော် သုံးစွဲနည်းကို မသိရှိ မလေ့လာဘဲ အများယောင်၍ ယောင်နေကြသူများရှိကြသည်။ အရောင်(၅)မျိုးကို အကန့်(၆)ကန့်ဖြင့် စီစဉ်ထားရာ၌ လက်ယာဖက်အစွန်ဆုံးအကန့်မှာ အရောင်(၅)မျိုးကန့်လန့်အစင်းတွင် အပြာရင့်ရောင်ကို အထက်မှာ ထားရမည့်အစား အောက်တွင်ထားနေကြပေရာ အလံတော်ဇောက်ထိုးဖြစ်နေပေသည်။ အရောင်ကို စီစဉ်ရာတွင်လည်း မဉ္ဇိဋ္ဌ သပြေရောင်အဖြစ် ပန်းနုရောင်ကို သတ်မှတ်ထားသော်လည်း အချို့မှာ ပန်းနုရောင်နေရာတွင် ယောဂီရောင်ဟုခေါ်သော အနီရောင်အရင့်ကို ထည့်သွင်း ပြုလုပ်သုံးစွဲနေသည်ကို တွေ့ရပေသည်။
မော်တော်ယာဉ်တွင် တပ်ဆင်ရာ၌ တွေ့ရသည်များမှာ အလွန်ဝမ်းနည်းစရာကောင်းသော ဖြစ်ရပ်များ ဖြစ်ပေသည်။ အချို့ကားလေးများတွင် အလွယ်တကူပင် ကား၏လက်ဝဲဖက်ရှိ ရေဒီယိုဧရိယာတိုင်တွင် ဖြစ်သလို ချည်ထားသည်ကိုလည်းကောင်း၊ အချို့မှာ ကား၏လက်ဝဲဖက်တွင်ပင် ချည်ထားသည်ကို လည်းကောင်း၊ အချို့သောကားကြီးများတွင်လည်း လက်ဝဲဖက် တွင်ပင် ချည်ထားသည်ကိုလည်းကောင်း တွေ့မြင်ရပေသည်။ ကားပေါ်တွင်ပါလာသည့် သံဃာတော်များကလည်း မှားယွင်းနေမှုကို ပြုပြင်လမ်းညွှန်မှု မရှိကြချေ။ အလှူခံဌာနများတွင်လည်း ရောင်စုံအလံများသဖွယ် လမ်းဘေး၌ စီတန်းလျက် စိုက်ထူထားကြ ပေသည်။ ပို၍ဆိုးသည်မှာ သာသနာ့အလံတော်ကို ၀ါးလုံးငယ်တွင် တပ်ဆင်၍ ခရီးသွားကားများကို အလံဖြင့် ရပ်တန့်စေသည်မှာကား အမြင်ဆိုးရွားလှပေသည်။ အချို့သော နတ်ကန္နားပွဲများတွင်လည်း ဗုဒ္ဓသာသနာ့အလံ တလူလူလွှင့်ထူလျက် ညနေမှာ ကြက်ကြော်ကိုက် အရက်တိုက်နေသည်များ ၀မ်းနည်းဖွယ် မြင်တွေ့နေရ ပေသည်။
နှစ်စဉ် နွေရာသီရောက်ပြီဆိုသည်နှင့် ဘုရားဖူးယာဉ်များ တွင်တွင်ကျယ်ကျယ်ဘုရားဖူး ပို့ဆောင်နေကြ ပေသည်။ ဘုရားဖူးယာဉ်နှင့် ပို့ဆောင်ရေးအဖွဲ့များရှိနေ၍ ဗုဒ္ဓဘာသာဝင်များ ဘုရားဖူးခွင့်ရကြသည်ကြောင့် ဘုရားဖူးပို့ဆောင်ရေးအဖွဲ့များအား ကျွန်တော်ဗုဒ္ဓဘာသာဝင် တစ်ဦးအနေဖြင့် သာဓုခေါ်မိပါ၏။ သို့သော် ထိုဘုရားဖူးယာဉ်များတွင် ဗုဒ္ဓသာသနာ့အလံတော် သုံးစွဲနေသည်ကို တွေ့ရသည်မှာ ၀မ်းနည်းဖွယ် ဖြစ်ပေသည်။ သံဃနာယကလက်စွဲ အပိုဒ်(၃၉၅)၊အခန်း(က)တွင် ဖော်ပြထားသည်မှာ “ရဟန်းသံဃာတော်များ ပါသည်ဖြစ်စေ၊ မပါသည်ဖြစ်စေ မည်သည့်ဘုရားဖူးယာဉ်တွင်မှ မတပ်ဆင်ရ” ဟု ဖြစ်ပေသည်။ ယခုမြင်တွေ့ နေရသည်မှာ မိသားစုဘုရားဖူးအဖွဲ့ရော၊ စုပေါင်းငှားရမ်း၍ သွားသည့်အဖွဲ့ရော ၊ အခကြေးငွေဖြင့် ဘုရားဖူးပို့ဆောင်ရေးအဖွဲ့များရော ဗုဒ္ဓသာသနာ့အလံ တလူလူလွှင့်၍ သွားလာနေကြပေသည်။ တပ်ဆင်ရာတွင်လည်း ၀ဲဘက်မှာရော၊ ဇောက်ထိုးပြောင်းပြန်ဖြစ်သလို အလွယ်တကူ တပ်ဆင်နေကြပေသည်။

မြန်မာနိုင်ငံသည် ထေရ၀ါဒဗုဒ္ဓသာသနာ ထွန်းကားသော နိုင်ငံဖြစ်သည့်အားလျော်စွာ သာသနာတော်ကို ကြည်ညိုသူများလည်း များပြားပေသည်။ ဗုဒ္ဓသာသနာတော်ကို ကြည်ညိုသူတို့မှာ ဗုဒ္ဓ၏ရောင်ခြည်(၆)သွယ်ကို အခြေပြု၍ စီစဉ်ထားသော ဗုဒ္ဓသာသနာ့ အလံတော်ကိုလည်း ကြည်ညိုကြပေသည်။ ဗုဒ္ဓသာသနအလံတော် တပ်ဆင်လာသည့် ယာဉ်များကို ရပ်တန့်စစ်ဆေးရှာဖွေခြင်းမပြုဘဲ ကင်းလွတ်ခွင့်ပေးကြ၏။ ဤသည်ကို အကြောင်းပြု၍ အပ်သည် မအပ်သည်ကို မလေ့လာတော့ဘဲ သုံးစွဲနေကြပေသည်။ အချို့မှာမူမသိမနားလည်၍ သူများပြောသမျှ ယုံကြည်ကြပြီး ရောယောင်သုံးစွဲခြင်း ဖြစ်ကြသည်။
အလံတော်ဟူသည် တိုင်းပြည်၊ နိုင်ငံ၊ ဒေသ အဖွဲ့အစည်းများအလိုက် ဂုဏ်ယူစွာ အထွတ်အထိပ် သတ်မှတ် တံဆိပ်ခတ်လျက် စီစဉ်ထားခြင်းဖြစ်ပေသည်။ ထို့ကြောင့် ထိုအလံတော်ကို မရိုမသေပြုသူသည် ထိုအလံတော်ကို ကိုယ်စားပြုသည့် တိုင်းပြည်၊ နိုင်ငံ၊ ဒေသအဖွဲ့အစည်းကို စော်ကားရာကျပေသည်။ ထိုသို့ အလံတော်ကို မရိုမသေ မအပ်မရာ သုံးစွဲသည်ကို တွေ့ရှိပါက ပြစ်မှုဥပဒေအရ အရေးယူသည်ကို တွေ့ခဲ့ဖူးသည်။ ရုပ်ရှင်ရုံများတွင် ရုပ်ရှင်မပြသမီ နိုင်ငံတော်အလံကို စတင်ပြသပြီး နိုင်ငံတော်သီချင်းဖွင့်ပေးရာ ပွဲကြည့်ပရိသတ်များက မတ်တပ်ရပ်၍ ငြိမ်သက်စွာနေပြီး အလေးပြုရသည်။ ဗုဒ္ဓသာသနာ့အလံတော်သည် ထေရ၀ါဒဗုဒ္ဓသာသနာအလံတော်သည် ထေရ၀ါဒဗုဒ္ဓသာသနာတော်၏ အထွဋ်အထိပ် အထိမ်းအမှတ်အဖြစ် သတ်မှတ်ထားပေရာ ဗုဒ္ဓသာသနာအလံတော်မှာ ပူဇော်ထိုက်သောအရာ ဖြစ်ပေသည်။ ယခုအခါ ဗုဒ္ဓသာသနာ့ အလံတော်တပ်ဆင်သုံးစွဲနေကြသည်မှာ “ပူဇာစ ပူဇနေယျာနံ” ပူဇော်ထိုက်သည်ကို ပူဇော်ခြင်းမဖြစ်ဘဲ အဂါဝရ အရိုအသေမဲ့ ဆောင်ရွက်နေကြ ပေသည်။ ဗုဒ္ဓသာသနာအလံတော်ဟူ၍ ရိုသေသမှုမပြုဘဲ ရောင်စုံအလံများ သဖွယ် ပေါ့ပေါ့တန်တန် ပြုနေကြသည်။ အများ၏ အမြင်တွင် အထင်သေးစရာဖြစ်နေ ပေသည်။ ကမ္ဘာတလွှားတွင် ထေရ၀ါဒဗုဒ္ဓသာသနာ ထွန်းကားသောနိုင်ငံအဖြစ် ထင်ထင်ရှားရှား ဖြစ်နေသော်ငြားလည်း ဗုဒ္ဓသာသနာ့အလံတော်ကို သုံးစွဲနေမှု ပုံစံမကျသည်ကို မြင်တွေ့နေရသည်မှာ ဗုဒ္ဓသာသနာတော် ညှိုးမှိန်အောင်ပြုလုပ်နေသလို ဖြစ်သည်ဟု ခံစားရပါသည်။

ထို့ကြောင့် ထေရ၀ါဒ ဗုဒ္ဓသာသနာတော်ကို ကြည်ညိုလေးစားလျက် ထေရ၀ါဒ ဗုဒ္ဓသာသနာတော်မြတ် သန့်ရှင်းတည်တံ့ပြန့်ပွားရေးတွင် အနှောက်အယှက်ဖြစ်စေသည့် ဗုဒ္ဓသာသနာ့အလံတော်သုံးစွဲမှုကို ကန့်သတ်၍ လုပ်ထုံး လုပ်နည်းစည်းမျဉ်းများပြဋ္ဌာန်းလျက် အရေးယူဆောင်ရွက်သင့်ကြောင်း သာသနာ့ မာမက စိတ်ဖြင့် ရေးသားလိုက်ရပါသည်။

ဗုဒ္ဓ သာသနံ စိရံ တိဋ္ဌတု
Lin Oo (psy)