ယင်းအကြောင်းနှင့် စပ်လျဉ်း၍ တစ်ခါက စာရေးသူ၏ မိသားစုသည် တရုတ်မျိုးနွယ်မှ ဆင်းသက်လာခဲ့ကြရာ နှစ်စဉ်ဆိုသကဲ့သို့ အများနည်းတူ တရုတ်နတ်ရှိခိုး ကြပါသည်။ ထိုသို့ရှိခိုးကြရာဝယ် ၀က် ၊ ကြက်ကောင်လုံးပြုတ်(အကင်)၊အရက် အမျိုးမျိုး၊ မုန့်တီကွေးစသည့် အချိူ စားသောက်ဖွယ်ရာများကို ခင်းကျင်းကာ အတိတ်က ကွယ်လွန်ခဲ့သော ဘိုးဘွားဘီဘင်စသည့် ဆွေမျိုးများကို လာရောက်သုံးဆောင်ကြရန် အမွှေးတိုင်ထွန်းကာ ရှိခိုးပြီး ဖိတ်ခေါ်ကြရသည်။ တစ်နှစ်တွင် ဖခင်ကြီးသည် သာသနာ့ရိပ်သာသို့ သွားရောက်ပြီး တရားအားထုတ်ခဲ့ရာမှ ကိုယ်လျှောက်လှမ်းရမည့် မှန်ကန်သော လမ်းကို တွေ့မြင်သည်မှစ၍ လမ်းမှားကို စွန့်ခွာရန် အား ထုတ်ပါလေတော့သည်။ အဖေတို့မိသားစုတွင် ကိုးကွယ်သင့်ကိုးကွယ်ထိုက်သော ရတနာသုံးပါး ရှိနေပေပြီ၊ ထို့ကြောင့် ယနေ့မှစ၍ နောက်နောင် လုံးဝ တရုတ်နတ်ရှိခိုးမှု မပြုတော့ပြီ၊ ဟု ရဲရင့်စွာ ယတိပြတ် ဆုံးဖြတ်ခဲ့လေသည်။ ထိုနှစ်မှစ၍ ယခုအချိန်အထိ တရုတ်ရှိခိုးမှု မပြုကြတော့ပေ။ တိုက်ဆိုင်၍လော မပြောတတ်ချေ။ ထိုတရုတ်နတ် ရှိခိုးမှု မပြုသော နှစ်၌ပင်လျှင် အငယ်ဆုံး ညီမငယ် အိမ်ပေါ်မှ အိမ်အောက်သို့ လိမ့်ကျကာ အတွင်းဒါဏ်ရခဲ့ပါသည်။ ယနေ့ထက်တိုင် အခန့်မသင့်လျှင် ပြန်၍ နာနေသေးသည်။ ပတ်ဝန်းကျင်မှလူများသည် ထိုအဖြစ်အပျက်ကို ကြည့်ပြီး တရုတ်နတ်ရှိခိုးမှု မပြုသည့်အတွက် သည်လိုခံရသည် ဟု စွတ်စွဲပြောဆိုကြလေသည်။ ထိုသို့ဖြစ်သော်လည်း ဖခင်ကြီးသည် နှစ်ရှည်လများက စွဲယူလာခဲ့သော ထိုအယူကို အပြီးတိုင် စွန့်လွတ်ခဲ့သည့်အတွက် တိုက်ဆိုင်မှုမျှပါပဲဟု သင့်တင့်စွာနှလုံးသွင်းကာ တရုတ်နတ်ရှိခိုးခြင်းကို လုံးဝ မပြုလုပ်တော့ချေ။
နောင်တွင် ထိုနတ်ကို ရှိခိုးမှု မပြုသည့်အတွက် ထူးခြားမှု မည်သို့မျှ မဖြစ်တော့ချေ။ ဖခင်ကြီးကွယ်လွန်သည့်နောက်တွင်လည်း ရှိခိုးမှုမပြုတော့ပေ။ ဤသည်ကား ဖခင်ကြီး၏ မှန်ကန်သော လမ်းညွန်မှုကို ရခဲ့သောကြောင့် စာရေးသူတို့ မိသားစုသည် ကိုးကွယ်မှုမှန်ကန်ခဲ့ရခြင်းဖြစ်ပါသည်။
တရုတ်နတ်ရှိခိုးခြင်းသည် ရှေးပဝေသဏီကပင်လျှင် စတင်ခဲ့ကြဟန်တူပါသည်။ တရုတ်နတ်များကို စားသောက်ဖွယ်ရာများဖြင့် ရှိခိုးပူဇော်သောအခါ ထိုနတ်များသည် လူတို့အား စီးပွါးလာဘ်လာဘပေါများစေသည်၊ ရောဂါဘယကင်းရှင်းစေသည်၊ ကျန်းမာရေးကောင်းစေမည် ဟု တထစ်ချ မှတ်ယူ ယုံကြည်ထားကြပါသည်။ အကယ်၍ သူတို့ကို စားသောက်ဖွယ်များဖြင့် ရှိခိုး ပသမှု မပြုလုပ်ကြဘူးဆိုလျှင် ကျန်းမာရေးချို့တဲ့အောင်ပြုလုပ်လိမ့်မည်၊ စီးပွားရေးပျက်အောင်ပြုလုပ်လိမ့်မည်၊ အိမ်ထောင်ရေးပျက်ယွင်းအောင်ပြုလုပ်လိမ့်မည်၊ အသက်ဘေးနှင့်လည်းတွေ့ကြုံရမည်ဟု မကောင်းသော ခြောက်လှန့်မှုများကြောင့် တစ်နှစ် တစ်ကြိမ်ဆိုသကဲ့သို့ ထိုနတ်ကို ရှိခိုးပသနေရခြင်းဖြစ်ပါသည်။ ငွေကြေးမတတ်နိုင်သူများဆိုလျှင် မချစ်သော်လည်း အောင့်ကာနမ်း ဆိုသကဲ့သို့ ဆိုခဲ့ပြီးသောခြောက်လန့်မှုများကြောင့် မရှိခိုးချင်သော်လည်း ရှိခိုးနေကြရပါသည်။ မဖြစ်သော်ကံရာရှိ ဆိုသကဲ့သို့ ထိုနတ်ကို ရှိခိုးကြရသည်ချည်း ဖြစ်ပေသည်။
တရုတ်မျိုးနွယ်စုဆိုလျှင် မှန်သည်ဖြစ်စေ၊ မှားသည်ဖြစ်စေ၊ နားထောင်၍ကောင်းသေးသည်၊ ယခုအခါ၌ကား မြန်မာစစ်စစ်ပင်ဖြစ်ပါသော်လည်း အတိတ်မှ တရုတ်နတ်လိုက်သည် (အချို့ကား ရှမ်းနတ်၊ကရင်နတ်လိုက်သည်) ဟု ဆိုကာ ဗေဒင်ဆရာ၊နတ်သူငယ်၊ဆေးဆရာတို့၏ မဆင်မခြင် ဟောပြောမှုတို့ကြောင့် မြန်မာမျိုးနွယ်မှ မွေးဖွားလာသော မြန်မာစစ်စစ်ဆိုသူ(oreginal)များပင်လျှင် ကြောက်လန့်ကာ တရုတ်နတ်၊ရှမ်း၊ကရင်နတ်စသည်တို့ကို ကိုးကွယ်နေကြလေကုန်ပြီ၊ စိတ်ပျက်ဖွယ်ကောင်းပေစွ။ တွေးမိသည်မှာ-ထိုနတ်များသည် လူကကျွေးမှ စားရရှာပါသည်။ ထိုသို့ဖြစ်ပါလျှက် လူများက အဘယ်ကြောင့် အားကိုးနေရပါသနည်း။ စင်စစ် အားကိုးသည်ဆိုရာဝယ် ကိုယ့်ထက်သာလွန်သော တန်ခိုးကြီးသော အထက်တန်းစားနတ်ဆိုလျှင် အားကိုးရသည့်အတွက် အကျိုးအမြတ်တော့ ရရှိပေဦးမည်။ ယခု၌ကား ပိုက်ဆံများစွာ အကုန်အကျခံကာ ကျွေးသာကျွေးလိုက်ရသည် ။ နောင်အနာဂါတ်တွင် မည်သို့ဖြစ်လာမည်ကို မည်သူမှ မသိနိုင်ချေ။ သေချာသည်ကား စုဆောင်းထားသည့် ငွေများသာ ကုန်သွားကြသည်ချည်းပင်။
ယခုဆိုလျှင် ထိုလုပ်ရပ်များသည် စာရေးသူတို့ မြို့၌သာမက နိုင်ငံနှင့်အ၀ှမ်းတွင် အရိုးစွဲနေပေပြီ၊ စားသောက်ဖွယ်ရာများဖြင့် နတ်ကို ပသကျွေးမွေးသည်ဆိုရာ၌ ကြက်၊၀က်၊ အရက်တို့ကို ထိုနတ်က သုံးဆောင်နိုင်ပါမည်လား၊ နတ်ဆိုသည်မှာ အမှန်စင်စစ် လူတို့၏ အနားသို့ ချည်းကပ်ရန်ပင် မဆိုထားနှင့် လူတို့၏ အနံ့ကိုပင် ခံနိုင်စွမ်းမရှိသောကြောင့် နတ်များတော့ မဖြစ်နိုင်ပေ၊ ပြိတ္တာမျိုးနွယ်စုများအနက်မှ တစ်မျိုး ဖြစ်ကောင်း ဖြစ်ပေလိမ့်မည်။ ထိုသို့ဆိုလျှင် ဘုန်းကံရှိသော အဆင့်တန်းမြင့်သည့်လူများသည် ဘုန်းကံနိမ့်ကျသော ပြိတ္တာများကို ရှိခိုးမှု ပြုသင့်ပါ၏လော၊ ချင့်၍ ယုံကြည်ကြပါရန်။
အမှန်စင်စစ် နတ်များဖြစ်သည်ဆိုစေဦးတော့၊ ထိုနတ်များကို ကိုးကွယ်သင့်ပါသလား၊ နတ်များကို ကိုးကွယ်ရှိခိုးမှု မပြုသင့်ပါ၊ ပသမှု ပြုမည်ဆိုလျှင် ပြုကောင်းပါသည်၊ ပသမှုဟူသည် သီလရှိသော ရဟန်းသံဃာများအား အိမ်သို့ ပင့်ဆောင်၍ ဆွမ်းလုပ်ကျွေးကာ ကုသိုလ်အဘို့ကို ဆိုင်ရာနတ်များအား အမျှအတမ်းပေးဝေခြင်းသည် နတ်များကို အကောင်းဆုံးသော ပသနည်းဟု သုနိဓနှင့်ဝဿကာရအမတ်တို့၏ ဖြစ်ရပ်တွင် မြတ်ဗုဒ္ဓဟောတော်မူထားခဲ့ပါသည်။
(၆.၂.၂၀၀၈) ဗုဒ္ဓဟူးနေ့-
ထိုနေ့တွင် နတ်ရှိခိုးခြင်းနှင့်ပတ်သက်၍ မြို့နေလူများ မသိလိုက်သော ထူးခြားသည့် ဖြစ်ရပ်တစ်ခု ပေါ်ပေါက်ခဲ့ပါသည်။
ထိုဖြစ်ရပ်ကား မြိတ်မြို့-ကွက်သစ်ရပ်တွင်နေထိုင်သော ဒေါ်ဆန်းလှမိသားစုသည် တရုတ်မျိုးနွယ်စုမှ ဆင်းသက်လာသောသူများဖြစ်သောကြောင့် အများနည်းတူ နှစ်စဉ်နှစ်တိုင်း တရုတ်နတ်ရှိခိုးခဲ့ရာတွင် ယနေ့ထိတိုင်အောင်ပင်ဖြစ်သည်။ (၂၀၀၈)ခုနှစ်မှစ၍ နတ်ရှိခိုးခြင်းအမှုကို မပြုတော့ဘဲ ရဟန်းသံဃာတော်များကို အိမ်သို့ပင့်ဖိတ်၍ ဆွမ်းလှူဒါန်းကာ ကုသိုလ်အဘို့ကို ဆိုင်ရာနတ်များအား ရေစက်ချ အမျှတမ်းပေးဝေခဲ့ကာ ဗုဒ္ဓနည်းကျ ကုသိုလ်ဒါန ပြုလုပ်ခဲ့ပါသည်။ ရဟန်းသံဃာတော်များ၏ မှန်ကန်သော လမ်းညွန်မှုအရိပ်ကို ခိုလှုံကာ နတ်ကိုးကွယ်မှု အယူအဆမှ အောင်မြင်စွာ ရုန်းထွက်နိုင်ခဲ့ပြီဖြစ်သော ထိုမိသားစုအတွက် ကြည်နူးဝမ်းမြောက် ခဲ့ရပါသည်။
ကောင်းမှုပွဲတွင် ဆရာတော်ဟောပြောသော တရားတော်သည် နာရသူအဖို့ စိတ်ဝင်စားဖွယ် မှတ်သားဖွယ်ကောင်းလှသော ကြောင့် မှတ်မိသမျှ ပြန်၍ ပြောရလျှင်-
တရုတ်နတ်ရှိခိုးခြင်းသည် ခေတ်အဆက်ဆက်က ပြုလုပ်ခဲ့သည့်အတွက် ထိုအခြင်းအရာကို စွန့်လွတ်နိုင်ရန် လွယ်ကူ သောအရာမဟုတ်ပါချေ။ သာမန်ယုံကြည်မှုမျိုးဖြင့် ပြတ်ပြတ်သားသား စွန့်လွတ်နိုင်ရန် ခဲယဉ်းလှပေသည်။ မှန်ကန်သော အသိအမြင်တို့ဖြင့် ဘုရား၊တရား၊သံဃာ ရတနာသုံးပါးတွင် သက်ဝင်ယုံကြည်သော သဒ္ဓါတရားရှိမှသာလျှင် ထိုအယူကို စွန့်လွတ်နိုင်ပါသည်။ ထိုအယူကိုစွန့်လွတ်ပြီး ရတနာသုံးပါးကို သက်ဝင်ယုံကြည်လျှင် ဥပါသကာဟုခေါ်ပါသည်။ ဥပါသကာတစ်ယောက်ဖြစ်ရန် အရည်အချင်း (၅)မျိုးနှင့်ပြည့်စုံရပါမည်။ ၄င်းတို့မှာ-
၁။ သဒ္ဓါတရားနှင့်ပြည့်စုံခြင်း
အရေးကြုံလျှင် ဗေဒင်၊ လက္ခဏာ၊နတ်သူငယ်ဟောပြောချက်များ၊ ဘိုးဘိုးအောင်၊ဘိုးမင်းခေါင်၊ ဘိုးတီဘွား၊ ကွမ်ရင် စသည်များကို အားမကိုးသင့်ပေ။ ထိုအရာများက မိမိဘ၀ကို အပြောင်းလဲကြီးပြောင်းလဲအောင် မဖန်တီးပေးနိုင်ချေ။ မိမိဘ၀ကို ဖန်တီးပေးနိုင်သော အရာသည် ရတနာသုံးပါးပင်ဖြစ်သည်။ ရတနာသုံးပါးမှတစ်ပါး ကိုးကွယ်အားထားရာဟူ၍ မရှိဟု မှန်ကန်သော အတွေးအမြင် ဥာဏ်ယှဉ်ကာ ရတနာသုံးပါးအပေါ်တွင် ယုံကြည်မှုရှိရပါမည်။ ဤသည်ပင်လျှင် သဒ္ဓါတရားနှင့်ပြည့်စုံသည်ဟု ခေါ်ပါသည်။
၂။ အနည်းဆုံး ငါးပါးသီလပြည့်စုံရမည်။
ငါးပါးသီလကို ခါးဝတ်ပုဆိုးကဲ့သို့ မြဲ၍ အချက်ငါးချက်ကို ရှောင်ကြဉ်ရပါမည်။
(က)။ လက်နက်ရောင်းဝယ်ဖေါက်ကားခြင်း၊
(ခ)။ လူအရောင်းအ၀ယ်ပြုလုပ်ခြင်း (ကျွန်ရောင်း ကျွန်ဝယ်ခြင်း၊ပြည့်တန်ဆာ ရောင်းဝယ်ခြင်းစသည်)၊
(ဂ)။ ကြက်၊၀က်၊ အမဲသား၊ ငါး ရောင်းဝယ်ခြင်း၊
(ဃ)။ မူးရစ်ဆေးဝါးအမျိုးမျိုးနှင့် သေရည်သေရက် ရောင်းဝယ်ခြင်း။
(င)။ လူကို သေစေတတ်သည့် အဆိပ် ရောင်းဝယ်ခြင်း။ တို့ဖြစ်ပါသည်။
၃။ ကောတုဟလမင်္ဂလခေါ် အထူးအဆန်းမင်္ဂလာကို ယုံကြည်လက်ခံခြင်း မပြုရ၊
မည်သည့်နေရာ၌ မင်းလောင်းပေါ်သည်၊ ထူးဆန်းသော ဘိုးတော်များပေါ်သည်၊ မြေကြီးထဲက သစ်မြစ်တွင် သဘာဝအရုပ် တစ်ရုပ်ပေါ်နေသည်၊ ထူးဆန်းသော ကိုရင်လေး၊ သဲံဆွမ်းစားသော ကိုယ်တော်၊ ရေဆွမ်းဘုဉ်းသော ကိုယ်တော် လေကိုသာစားသော ကိုယ်တော်စသည့် ထူးဆန်းသော အရာများပေါ်လျှင် ဟုတ်၏ မဟုတ်၏ဟု ကိုယ်ပိုင်တွေးခေါ်မှု မရှိဘဲ အရမ်းယုံ အကမ်းယုံ ယုံလေတော့ သည်။ ထိုကဲ့သို့ ထူးဆန်းသော ကောတုဟလမင်္ဂလကို မယုံကြည်ရပေ။
၎။ ကံ-ကံ၏အကျိုးကို ယုံကြည်ရ၏၊
၅။ အယူပျက်သည့် သာသနာပ အလှူခံပုဂ္ဂိုလ်တို့ကို အရိုအသေမပြုရ မလှူဒါန်းရပေ။
ဆိုရေးရှိက ဆိုအပ်စွဆိုသကဲ့သို့ သာသနာပအလှူခံနှင့်စပ်၍ ပြောရပေဦးမည်၊ မကြာသေးမီက ရန်ကုန် -မော်လမြိုင် စုံဆန်ရထားပေါ်တွင် ဒေါက်ချာ ကြီးဆောင်းထားသူ ရသေ့ယောင်ယောင် ဘိုးတော်ယောင်ယောင်တစ်ဦးသည် ဈေးသည်နှင့်အလားတူစွာ လူးလားခေါက်ပြန်သွားကာ “ (၇)ရက်သားသမီးများ စီးပွးတက်ချင်တယ်၊ လာဘ်ရွှင်ချင်တယ်ဆိုရင် ၀တ်ထားသော ရွှေနားကပ်၊ ရွှေဆွဲကြိုး ၊ရွှေလက်ကောက်တို့ကို ပေးလှူက ကြီးပွားမြန်တယ်” ဟု ငွေဖလားကိုင်ကာ အော်ကြီးဟစ်ကျယ်ဖြင့် အလှူခံနေသည်မှာ သာသနာတော်ကို အိုးမဲသုတ်နေသည့်အတွက် ရှက်စရာကောင်းလှပါသည်။ ပြောလိုသည်မှာ ယနေ့ခေတ် ရသေ့၊ ဘိုးတော်၊ ကွမ်ရင် ၊ အမ်းကုန်း၊ ပေါင်ကား ဒူးထောင် ဘိုးမင်းခေါင်စသည့် သသနာအပြင်ဘက်က သူများအား ရိုသေမှု မပြုသင့်ပါ၊ လှူဒါန်းမှု မပြုသင့်ပါ။
အဆိုပါ အင်္ဂါရပ်များနှင့် ပြည့်စုံသော ပုဂ္ဂိုလ်ကို နှစ်သက်ကြည်ညိုဖွယ် ဥပါသကာ ဟုလည်းကောင်း ၊ အရည်အသွေးပြည့်သော ဥပါသကာ ဟုလည်းကောင်း ခေါ်ပါသည်။ နောင်တွင်လည်း ဘ၀တွင် ဥပါသကာကောင်းတစ်ယောက်အဖြစ် အစဉ်အမြဲရပ်တည်နိုင်ရန် အတွက် ဆိုခဲ့ပြီးသော ဥပါသကာ၏ အရည်အချင်းနှင့် ပြည့်စုံအောင် ကြိုးစားကြစေချင်ပါသည် ဟု ပြောကာ တရားတော်ကို အဆုံးသတ် သွားခဲ့ပါသည်။
